ل دهۆكێ كوڕێن خابووری دێ مێڤانداریا دیوانیه كه‌ن
ئه‌ڤرۆ،
چاڤه‌ڕێ دهێته كرن ئه‌ڤرۆ ل ده‌مژمێر 3:30 ئێڤاری تیما یانا زاخۆ ل یاریگه‌ها یانا دهۆكێ مێڤانداریا یانا دیوانیه بكه‌ت ژ چارچووڤێ گه‌ڕا 26ێ یا هه‌ڤڕكیێن خولا پلا نایابا ئیراقێ یا ته‌پا پێی، پشتی بۆ ماوێ نێزكی هه‌یڤه‌كێ هاتیه راوه‌ستاندن ژبه‌ر پشكداریا هه‌لبژارتیێ ئیراقێ بۆ ڤاڤارتنێن مۆندیالا قه‌ته‌ر، ده‌ستنیشانكرنا یاریگه‌ها دهۆكێ هات پێخه‌مه‌ت به‌رده‌وامیا سه‌خبیریێ د ناڤ یاریگه‌ها زاخۆ یا نێڤده‌وله‌تی دا.
كوڕێن خابووری ل رێزا هه‌شتێ دهێن ب 37 خالان و هه‌مبه‌ری وێ دیوانیه 18 خال كۆمكرینه و ل رێزا 18ێ دهێت لبن گه‌فێن داكه‌فتنێ یه بۆ پلا ئێك، زاخۆ دێ ب پشتبه‌ستنێ ب جه‌ماوه‌رێ و هێزا یاریزانێن خوه كه‌ت ژبۆ ده‌ستڤه ئینانا سه‌ركه‌فتنێ نه كو بتنێ بۆ پاراستنا جهێ خوه به‌لكو پێشڤه بچیت بۆ رێزێن پێشیێ، هه‌رچه‌نده تیما دیوانیه ژ هه‌ڤڕكێن بهَێز نینه لێ د ته‌پا پێی دا ئه‌و تیما مفایی ژ ده‌لیڤێن خوه وه‌ربگریت دێ سه‌ركه‌فتی بیت.
لدور ڤێ یاریێ حه‌مید حاجی یاریزانێ یانا زاخۆ بۆ رۆژناما ئه‌ڤرۆ گوت: بۆ یاریا ئه‌ڤرۆ و یێن داهاتی دڤێت به‌رده‌وام سه‌ركه‌فتنان بینن و خالان ژ ده‌ست نه‌ده‌ین، له‌ورا مه به‌رهه‌ڤیێن باش كرینه و هه‌موو یاریزان رژدن بۆ سێ خالان و بكه‌ینه دیاری بۆ جه‌ماوه‌رێ خوه ئه‌ڤچا هیڤییا مه ئه‌وه كو هه‌موو جه‌ماوه‌ر ل یاریگه‌ها دهۆكێ به‌رهه‌ڤبن و ژبیر نه‌كه‌ین تیما دیوانیه ژی سێ خال دڤێن كو دێ هه‌موو شیانێن خوه د ناڤ یاریگه‌هێ دا مه‌زێخیت دا بشێت خوه ژ رێزێن داكه‌فتنێ دوور بێخیت.
ژلایه‌كێ دووڤه سوبه‌هی پێنچ شه‌مبی ل ده‌مژمێر 10ی شه‌ڤ ل یاریگه‌ها شه‌هید فرانسۆ حه‌ریری ل هه‌ولێرا پایته‌خت كوڕێن قه‌لا و مناره دێ مێڤانداریا یانا كاره‌با یا به‌غدایی كه‌ن د یاریه‌كا پری هه‌ڤڕكی دا ژبۆ باشكرنا رێزبه‌ندیا خوه، هه‌ولێر ئه‌وا ب 29 خالان رێزا 13ێ دهێت و كاره‌با ب 30 خالان رێزا 11ێ دهێت.
