ل دهۆكێ كەسەك هاتە كوشتن و ئێك ژی هاتە برینداركرن
پەیڤدارێ رێڤەبەریا پۆلیسێن پارێزگەها دهۆكێ، بۆ رۆژناما ئەڤرۆ دیار كر، دوهی ل دەمژمێر شەشی سپێدێ، تاوانەكا كوشتنێ ل تاخێ نزاركێ ل سەنتەرێ باژێرێ دهۆكێ روودایە.
عەقید هێمن سلێمان، پەیڤدارێ رێڤەبەریا پۆلیسێن پارێزگەها دهۆكێ خویا كر، ئەو تاوانە ژ ئەگەرێ تەقەكرنێ بوویە د ناڤبەرا چەند پسمامێن ئێك دا، د وێ روودانێ دا كەسەك بناڤێ (شاكر حامد) هاتیە كوشتن و برایێ وی ب ناڤێ دژوار حامد ژی بریندار بوویە و هاتیە رەوانەكرن بۆ نەخۆشخانا تەنگاڤیان ل دهۆكێ، پشتی پۆلیس گەهشتینە جهێ روودانێ، بڕیارا گرتنێ بۆ تۆمەتباران دەركەفتیە».
ناڤهاتی گۆتژی: «ل دووڤ بەندێ 406 ژ قانوونا سزادانێ بڕیارا گرتنێ بۆ هەرسێ تۆمەتباران دەركەفتیە، لێ تۆمەتبار ژ جهێ روودانێ رەڤینە و خوە رادەست نەكریە، بەلێ بڕیارا گرتنێ ژ لایێ دادوەرێ ڤەكۆلینێ ڤە بۆ وان دەركەفتیە و د نوكە دا ڤەكۆلین د ڤێ كەیسی دا یا بەردەوامە، دیسا هەتا نوكە نەهاتیە زانین كانێ ئەگەرێن ئەنجامدانا ئەڤێ تاوانێ چ بووینە».
