ل دهۆكێ دەلیڤەیا كاری بۆ زێدەتری ٢ هزار كەسان هاتیە رەخساندن
دلۆڤان ئاكرەیی
رێڤەبەرێ سامانێن ئاژەلی ل وەزارەتا چاندنا هەرێما كوردستانێ دیار كر: هەرێما كوردستانێ سالانە پێدڤی ب 500 هزار لترێن شیری هەیە، ل دەمەكێ كو نوكە ب تنێ 300 هزار لتر دهێنە بەرهەمئینان و مە 200 هزار لتر ب كێمی هەنە، لەورا حوكمەتا هەرێما كوردستانێ پلانەكا ستراتیژی هەیە بۆ پڕكرنا ڤێ كێماسیێ و گەهشتن ب ئاستێ خۆژینێ د ماوێ چوار سالێن بهێت دا.
فیراس سدیق، رێڤەبەرێ سامانێن ئاژەلی ل وەزارەتا چاندنا هەرێما كوردستانێ بۆ رۆژنامەیا ئەڤرۆ گۆت: كابینەیا نەهێ یا حوكمەتا هەرێما كوردستانێ گرنگییەكا زۆر دایە كەرتێ چاندنێ و پێشخستنا بەرهەمێ خۆمالی و د ڤی چارچۆڤەی دا، چەندین پرۆژەیێن ستراتیژی د وارێ ئاسایشا خۆراكی دا ئەنجام داینە، وەك دروستكرنا سایلۆیان، ساردگەهـ و خانیێن پلاستیكی. هەروەسا باج ژی خستیە سەر بەرهەمێن هاوردەكری بۆ پالپشتییا بەرهەمێ ناڤخۆیی.
ناڤبری ئاشكرا كر: ئێك ژێ پرۆژەیێن ستراتیژی یێن هەرێما كوردستانێ، پرۆژەیێ كاڤین فارمە ل پارێزگەها دهۆكێ كو ئێكە ژ پرۆژەیێن ستراتیژی بۆ پێشێخستنا كەرتێ چاندنێ و بەرهەمئینانا شیرەمەنیێ، ئەڤ پرۆژەیە ب ئێك ژ مەزنترین پرۆژەیێن خودانكرنا چێلان و بەرهەمئینانا شیرەمەنیێ ل سەر ئاستێ كوردستان و ئیراقێ دهێتە هژمارتن.
د ڤی پرۆژەی دا پتر ژ 2000 سەرێن چێلێن شیردەر ب خۆڤە دگریت و رۆژانە شیانێن بەرهەمئینانا نێزیكی 130 تەنێن شیری هەنە، ئەڤ بەرهەمە د كارگەهەكا مۆدێرن دا دبیتە بەرهەمێن سپیاتی و یێن دی یێن شیری وەك ماست، پەنیری و دەوی و ئاڤەماست، پاشی ل بازارێن ناڤخۆ یێن هەرێما كوردستانێ و ئیراقێ دهێتە بەلاڤكرن.
فیراس سدیق گۆت ژی: پرۆژەیێ كاڤین فارم پشكەكە ژێ گاڤێن حوكمەتا هەرێمێ بۆ پێشڤەبڕنا كەرتێ ناڤخۆ و بەرهەمێن خۆمالی كو و ب كۆژمێ 80 ملیۆن دۆلاران ل سەر رووبەرێ 3,000 دۆنەمێن ئەردی ل پارێزگەها دهۆكێ هاتیە دامەزراندن و ڤی پرۆژەی دەلیڤەیێن كاری بۆ 2,500 كەسان رەخساندینە.
