ل دهۆكێ راگه‌هاندنه‌كا دروست و چه‌له‌نگ هه‌یه؟!
راگه‌هاندن ده‌ستهه‌لاتا چارێ یه و وه‌كو چاڤدێره‌كێ خورته ل سه‌ر حوكمه‌تێ و وه‌لاتیان و ل جیهانێ هه‌میێ راگه‌هاندنه ڤه‌گوهێزه‌رێ رویدانان. ل پارێزگه‌ها دهۆكێ یان ژی ل گشت كوردستانێ ل شوونا راگه‌هاندن ل تشته‌كی بگه‌ریێت و دووڤچوونێ بۆ بكه‌ت و نیشا خه‌لكی بده‌ت به‌ره‌ڤاژی ل ڤێره حوكمه‌ت و خه‌لك ل ده‌زگه‌هێن راگه‌هاندنێ دگه‌ریێن پێخه‌مه‌تی هه‌واله‌كی یان پێزانینه‌كێ بده‌نێ. بۆچی ئه‌ز ڤێ چه‌ندێ دبێژم؟.. ل 22/11 ب راستی بوویه‌ره‌كا گرنگ ل دهۆكێ هه‌بوو كو ژهه‌ژی هندێ بوو، راگه‌هاندنێ پووته‌پێ دابا، ئه‌و ژی رێڤه‌به‌ریا گشتی یا ره‌وه‌شه‌نبیری و هونه‌ری ل دهۆكێ ب هه‌ڤكاری ل گه‌ل كونسولگه‌ریا پۆله‌ندا ل هه‌ولێرێ كونسێرته‌كا مۆزیكا پیانۆیێ بو پیانستێ ناڤدارێ جیهانی (ڤیوچیك ڤاله‌چه‌ك ) ل هولا كونگره‌یان ل زانكویا دهۆكێ سازكر بوو. ناڤهاتی خودان چه‌ندین ده‌سكه‌فت و خه‌لاته ل سه‌ر ئاستێ جیهانێ ، گرنگی یا ڤێ رویدانێ د وێ چه‌ندێ دایه كه‌سه‌ك ژوه‌لاته‌كی بهێت كو ل وی وه‌لاتی كوردستان و عیراق هێلا سۆره ژبه‌ر شه‌رێ دژی (داعش) و بهێت خزمه‌تا مه بكه‌ت و چه‌ندین كارێن خوه چێژكێشی مه بكه‌ت كو خه‌لاتێن هه‌ره باش ل سه‌ر ئاستێ جیهانێ بده‌ستڤه‌ئیناینه، پێدڤیه كه‌نالێن راگه‌هاندنێ گرنگی دابا ڤێ بوویه‌رێ و پووته‌كێ مه‌زن ب ڤێ رویدانێ دابا ب تایبه‌تی تۆرا میدیایێ یا روداوو (ئێكه‌م بێ ركابه‌ر) و ئه‌ڤ بویه‌ره بۆ جیهانێ ڤه‌گوهاستبا چونكو دبیت ئه‌ڤ چه‌نده ببیته پالده‌ر بۆ گه‌له‌ك كه‌سێن دی كو حه‌زدكه‌ن بهێنه كوردستانێ و په‌یوه‌ندیێن ره‌وشه‌نبیری و هونه‌ری چێكه‌ن ، هه‌ر چه‌نده ژماره‌كا ده‌زگه‌هان ئاماده‌ببوون ئه‌وژی (كوردستان تی ڤی. كه‌نالێ وار. بادینان سات. كه‌نالێ زاگرۆس). دو رۆژنامێن رۆژانه ل دهۆكێ هه‌نه (رۆژناما وار و رۆژناما ئه‌ڤرۆ) رۆژناما ئه‌ڤرۆ یا نڤستی بوو ده‌رباره‌ی ڤێ بوویه‌رێ و چ تشت به‌لاڤنه‌كربوون ، رۆژناما وار ژی هه‌واله‌ك به‌لاڤكربوو ، لێ وێنه‌یه‌ك بكارئینابوو چ رامانا وێ كونسێرتێ نه‌ددا ، ب تنێ وێنه‌كێ (ڤیۆچیك ڤاله‌چه‌ك) ل سه‌ر هه‌والێ خوه دانابوو كو چ ده‌ربرین ژ وێ كونسێرتێ نه‌دكر.
دبیت گه‌له‌ك كه‌س بێژن رویدانه‌كا نۆرماله و پێدڤی رووماله‌كا مێدیایێ نه‌دكر ، چێجبیت ئه‌ڤ چه‌نده راست بیت، به‌لێ ب دیتنا من ل ڤان كاودانێن نازك كو شه‌رێ مه دگه‌ل (داعش)ب تنێ چه‌ند كیلومه‌ترێن كێم ژ مه دوورن و كه‌سه‌كێ پیانستێ ناڤدار كو ل ده‌ڤ وان كوردستان هێلا سۆره بهێت خزمه‌تا مه بكه‌ت ب هونه‌رێ خۆ ب راستی رویدانه‌كا زۆرا گرنگه و پێدڤی بوو راگه‌هاندنێ پویته‌كێ مه‌زن پێ دابا.