ل دهۆكێ فه‌يسبۆكى به‌رێ ژنه‌كێ دا زنايێ و ب دو سالان هاته حوكمكرن
ئه‌ڤرۆ نيوز:
پارێزەرەکێ دادگەھا دھۆکێ راگەھاند کو، گەنجەک و ژنەکا ب مێر ب رێیا فەیسبووکی ژڤانی ددەنە ئێکدو و زنایێ ل گەل ئێکدو دکەن ب وێ بھانەیێ کو گەنجی سوز دایە ڤێ ژنێ کو پشتی ئەو خوە ژ ھەڤژینێ خوە ددەتە بەردان دێ بۆ خوە ئینیت، بەلێ ھەڤژینێ وێ زانی و سکالایەک ل دادگەھێ ل سەر وان تومار کر و پشتی دادگەھکرنا وان ھەر ئێک ژ وان بۆ ماوێ دو سالان ھاتنە حوکم کرن.
ئەڤرۆ، جیھان کۆرەمارکی:
پارێزەر مەسعود سلێمان ل دادگەھا دھۆکێ بۆ رۆژناما ئەڤرۆ دیار کر کو، ژنەکا د ژیێ 26 سالیێ دا ب رێیا تۆرا جڤاکی یا فەیسبووکێ د پشت ھەڤژینێ خوە را پەیوەندیەکا حەزژێکرنێ ل گەل گەنجەکێ تازە پێگەھشتی کو د ژیێ 18 ساڵیێ دایە گرێ ددەت و گۆت: (ل دەسپێکێ ھەڤدیتن د ناڤبەرا وان دا دروست دبیت و پشتی پەیوەندیا وان ب ھێزتر دکەڤیت ژ ئەگەرێ پەیدابوونا ئاریشان د ناڤبەرا ژنێ و کەس و کارێن ھەڤژینێ وێ دا و ب بھانەیا چوونا درینگەھێ ئەڤ ژنە ژ مالا ھەڤژینێ خوە دەردکەڤیت و ل دووڤ داخوازا ڤی گەنجی بەر ب ژ دەرڤەی دھۆکێ دچن و ل ئێک ژ ئاڤاھیێن گەشت و گوزاری ژلایێ ڤی گەنجیڤە دھێتە ئاکنجی کرن کو پێشتر ڤی گەنجی سوز دابوویێ وێ بۆ خوە بینیت، لێ پشتی خوە ژ زەلامێ خوە ددەتە بەردان).
پارێزەری گۆتژی: (پشتی شەڤ ب سەر وان دا ھاتی ئەڤ کورە و ژنە نێزیکی ئێکدو دبن و ل دووڤ گۆتنا ڤی گەنجی ل دادگەھێ دا وی ھەموو شێوازێن سێکسی ل گەل ڤێ ژنێ ئەنجام داینە و ھەردویان ل دادگەھێ ژی دان ب ڤێ چەندێ کر).
پارێزەر مەسعود ئاشکرا ژی کر کو، پشتی ھینگێ ئەڤ گەنجە ڤێ ژنێ دھێلیت و د رەڤیت و ل دووڤ گۆتنا ژنێ وێ چەندین جاران پەیوەندی ب وی گەنجی کر کو بھێت چارەیەکێ لێ بکەت، لێ وی رەت کر و بۆ وێ دیار کر کو ھندەک ژ کەس و کارێن وی گۆمانێ ژێ دبەن و دێ زانن، لەوما ئەڤ ژنە نەچار دبیت و پەیوەندیێ ب برایێ خوە دکەت و برایێ وێ و بابێ وێ دھێن و دبەنە مالا خوە).
پارێزەری زێدەتر گۆت: (زەلامێ وێ سکالایێ ل سەر ھەردویان تومار دکەت و دادوەر ژی بریارێ ددەت کو ل گۆرەیی بەندێ 377 ژ برگا ئێکێ ژ قانوونا سزایێن عیراقی یا ژمارە 111 یا سالا 1969 بھێنە دەستەسەر کرن و دادگەھکرن و پشتی دادگەھکرنا وان سزا ل سەر ھاتە سەپاندن و ھەر ئێک ژ وان بۆ ماوەیێ دو سالان ھاتە حوکم کرن).
