ل دهۆكێ هزار و 345 كەس د ناڤا چاكسازیان دانە
هەولێر، قائید میرۆ:
رێڤەبەرێ گشتیێ چاكسازیان ل هەرێما كوردستانێ دیاركر، د دەمێ نوكە دا هزار و 343 كەس د ناڤا چاكسازیا مەزنان دا ل دهۆكێ هەنە و دبێژیت: پشتی دەركرنا لێبۆرینا گشتی دێ هژمارەكا حوكمدایان ژێ مفاداربن.
ئیحسان بابان، رێڤبەرێ گشتیێ چاكسازیێن هەرێما كوردستانێ بۆ رۆژناما ئەڤرۆ دیاركر، قەلەبالغیەكا زۆر ل سەر چاكسازیێن هەرێما كوردستانێ پەیدابوویە و گۆت: «ئەم چاڤەڕێی دەست ب كاربوونا پەرلەمانێ كوردستانێ دكەین، هەتا پڕۆژەقانوونا لێبۆرینا گشتی بهێتە پەسەندكرن، پڕۆژەقانوون هاتیە بەرهەڤكرن و نوكە ل سەرۆكایەتیا جڤاتا وەزیرانە و هەر دەمێ پەرلەمان دەست ب كاری بكەت، ئێكسەر بۆ پەرلەمانی دێ هێتە هنارتن، ئەم ژی دێ بەرهەڤبین ل پەرلەمانی بۆ ڤێ چەندێ پڕۆژە ببیتە قانوون و لێبۆرینا گشتی بهێتە دەركرن».
ئیحسان بابان گۆت ژی: «د دەمێ نوكە دا پێنج هزار و 717 كەس ل هەرێما كوردستانێ هاتینە حوكمدان و سزایێ خۆ د ناڤا چاكسازیان دا دەرباز دكەن، زۆرترین رێژەیا زیندانیان ل چاكسازیێن هەولێرێ یە، ل پارێزگەها دهۆكێ ژی هزار و 345 كەس د ناڤا چاكسازیا مەزنان دانە و 127 كەس ژی د ناڤا چاكسازیا ژن و زارۆكان دانە، بێگومان پشتی دەركرنا لێبۆرینا گشتی دێ هژمارەك مفاداربن».
