ل دهۆكێ 458 قوتابخانە هاتینە ئاڤاكرن و نووژەنكرن
ئەمیر ئەترووشی
رێڤەبەرێ گشتییێ پەروەردێ ل پارێزگەها دهۆكێ راگەهاند، ل پارێزگەها دهۆكێ 458 قوتابخانە هاتینە ئاڤاكرن و نووژەنكرن و بەرفرەهكرن و وان پلان هەنە بەردەوامیێ ب ڤی كاری بدەن و گۆت: ئەڤ پرۆسە دێ یا بەردەوام بیت و گەلەك قوتابخانەیێن دی ژی دقووناغا نووژەنكرن و بەرفرەهكرنێ دانە.
عومەر عەلی تاها رێڤەبەرێ گشتییێ پەروەردێ ل پارێزگەها دهۆكێ بۆ رۆژناما ئەڤرۆ دیار كر، هەر ژ دەستپێكا دەستبكاربوونا كابینەیا نەهێ یا حكومەتا هەرێما كوردستانێ و هەتا نوكە، 458 قوتابخانە هاتینە ئاڤاكرن و نووژەنكرن و بەرفرەهكرن، كو ل ژێر چاڤدێرییا پارێزگارێ دهۆكێ عەلی تەتەری، بەرێ بنیاتی بۆ ئاڤاكرنا 13 قوتابخانەیان ل سنۆرێ پەروەردەیا گشتییا دهۆكێ هاتییە دانان، 13 قوتابخانە هاتینە ئاڤاكرن و 94 قوتابخانە هاتینە بەرفرەهكرن و كەڤتینە د خزمەتا قوتابییاندا، 351 قوتابخانە ل سنۆرێ هەموو پەروەردەیێن سەر ب رێڤەبەرییا گشتییا پەروەردەیا پارێزگەها دهۆكێڤه هاتینە نووژەنكرن.
هەروەسا رێڤەبەرێ گشتییێ پەروەردێ ل سنۆرێ پارێزگەها دهۆكێ ئاشكراكر، ئەڤ هژمارا قوتابخانەیان هەموو ل سەر بودجەیا وەزارەتا پەروەردێ و كارگێرییا پارێزگەها دهۆكێ هاتینە ئاڤاكرن و نووژەنكرن و بەرفرەهكرن، ئەڤ پرۆسە دێ یا بەردەوام بیت و گەلەك قوتابخانەیێن دی ژی د قووناغا نووژەنكرن و بەرفرەهكرنێ دانە.
