ل دووڤ ئه‌نجامێن پشكنینان ئه‌م بڕیارا ئه‌نجامدانا نشته‌رگه‌ریێ دده‌ین
ئه‌ڤرۆ، به‌رپه‌رێ ساخله‌میێ:
تایبه‌تمه‌نده‌كێ بێهۆشكرنێ دیاردكه‌ت ده‌مێ نه‌خۆش دهێت ب تایبه‌تی ژی ئه‌گه‌ر پێدڤی ب بێهۆشكرنێ بیت بو هه‌ر جوره نشته‌رگه‌ریه‌كێ، به‌ری دانا په‌نجێ نه‌خۆش دهێته دیتن و پشكنینكرن ژلایێ تایبه‌تمه‌ندێ بێهۆشكرنێ ڤه، هه‌كه كێماسه‌ك هه‌بیت ئه‌م نشته‌رگه‌رییێ بو نه‌خۆشی ناكه‌ین و پێدڤیه هه‌موو نه‌خۆشیێن وی دكۆنترولكری بن پاشی په‌نج دهێته دانان.
د. مێڤان جه‌میل، تایبه‌تمه‌ندێ بێهۆشكرنێ دیاركر كو ل دووڤ ئه‌نجامێ پشكنینان و حاله‌تێ نه‌خۆشی ئه‌م كاردكه‌ین، چونكو چه‌ند جۆرێن په‌نجێ هه‌نه، بو نمونه په‌نجكرنا (گشتیی، نیڤپه‌نج په‌نجكرنا خوجهی، په‌نجكرنا دەمارێن هه‌ستكرنێ) و دەستنیشانكرنا ڤان جوره په‌نجا ل دووڤ حاله‌تێ نه‌خۆشی و جورێ نشته‌رگه‌ریێ دهێته‌كرن، و گۆت: پشتی پشكنینێن نه‌خۆشی دهێنه دیتن ژلایێ نۆشدارێ تایبه‌تمه‌ندێ بێهۆشكرنێ ڤه، دگه‌ل دیتنا پشكنینێن وی، ئه‌گه‌ر دیاربوو نه‌خۆشی نه‌خۆشیه‌كا ده‌گمه‌ن یان دومدرێژ هه‌بیت، و چاره‌سه‌ریا خوه دروست نه‌كربیت یان ئه‌گه‌ر پشكننێن وی تشته‌كێ نه‌یێ نورمال دیار بوو، تایبه‌ت بو وان نشته‌رگه‌ریێن سار، پێدڤیه نشته‌رگه‌ریا نه‌خۆشی بهێته پاشئێخستن ب مه‌ره‌ما هندێ بهێته دیتن ژلایێ نۆشدارێ تایبه‌تمه‌ند ڤه ل دووڤ حاله‌تێ نه‌خۆشی، ژ پێخه‌مه‌ت كۆنترۆلكرن و چاره‌سەركرنا حاله‌تێ نه‌خۆشی، وگوتژی: گه‌له‌ك نه‌خۆش هه‌نه هندەك جورێن چاره‌سه‌ریا بو هندەك نه‌خۆشیێن دی وەردگرن، وەك نه‌خۆشیێن (دەروونی و دلی و بهێنته‌نگیێ و گۆلچیسكا) هتد .. پێدڤیه هندەك ژوان جورێن چاره‌سه‌ریا ده‌مه‌كی به‌ری نشته‌رگه‌ریێ بهێنه راوەستاندن، و هندەك تا رۆژا نشته‌رگه‌ریێ د به‌ردەوام بن، هه‌روه‌سا ئه‌و نه‌خۆشێن گه‌له‌ك جگارا دكێشن پێدڤیه بو ماوه‌یه‌كی به‌ری نشته‌رگه‌ریێ ب راوەستینن.
د.مێڤان جمیل، ئاشكرا كر كو نشته‌رگه‌ری د ژێكجۆدانه، هندەك نشته‌رگه‌ری پێدڤیه بله‌ز بهێنه‌كرن، چونكو مه‌ترسی ل سه‌ر ژیانا نه‌خۆشی هه‌یه و ئه‌گه‌ر زوو نه‌هێته‌كرن ره‌نگه ژیانا خوه ژ دەست بدەت، بو نمونه نه‌خۆشه‌كێ تووشی روودانه‌كێ ببیت و خۆینبه‌ربوونه‌كا مه‌زن بو دروستببیت، بوو ڤان جورێن نشته‌رگه‌ریا وەك نۆشدار نه‌شێن خوه بگرن هه‌تا پشكنینێن وی ب ده‌ركه‌ڤن یان نه‌خۆشیه‌كا دومدرێژ نه‌هاتبیته كۆنترولكرن، و ئه‌و دەم نینه و دێ هێته نشته‌رگه‌ریكرن، جوره‌كێ دی یێن نشته‌رگه‌ریا هه‌یه كو راسته نه‌خۆش پێدڤیه به‌لێ نشته‌رگه‌ریه‌كا بله‌ز نینه، ئه‌ف جورێن نشته‌رگه‌ریا دانێ سپێدێ ل هه‌موو نه‌خۆشخانا ل دووف تایبه‌تمه‌ندیا خوه دكه‌ن، بوو ڤان جوره نشته‌رگه‌ریان ئه‌گه‌ر كێماسیه‌ك د پشكنینا دا هه‌بیت، یان حاله‌تێ نه‌خۆشی یێ هاریكارنه‌بیت بو دانا په‌نجێ ژبه‌ر هه‌ر ئه‌گه‌ره‌كی، پێدڤیه ئه‌ف نشته‌رگه‌ریه بهێته پاشئێخستن.
