ل دووڤ لۆكەیشنی جلكان دیزاین دكەم
هەرهین محەمەد:
میدیا عەلی، دیزاینەرا جلوبەرگێن فلم و دراما و فلمێن سینەمایی، ددیدارەكێ دا بۆ رۆژنامەیا ئەڤرۆ گۆت: دەمێ دیزاینا جلكان ددانم ل دەستپێكێ چیرۆكا درامایێ یان فلمێ سینەمایی دخۆینم دا باش كەسایەتیان بنیاسم و ل دووف كەسایەتیا وی جلكان دیزاین بكەم، بو نموونە د فلمی دا كەسەك گەلەك یی خەمگینە و ل وی دەمی نابیت رەنگێ سور بۆ بهێتە دانان، یان كەسەكی كومەكا ئاریشەیان هەبیت گرنگە رەنگەكێ تاری بۆ بهێتە دانان وەكو رەنگێ رەش و قەهوایی و كەسكێ تاری و نیلی و ل دووف رۆژان و لۆكەیشنان جلكان دیزاین دكەم و نابیت ئەكتەری دەستەكێ جلكان ل بەربیت هەتا دووماهیا زنجیرەیێ، یان درامایێ، دیسان هندەك جاران هەیە بۆ دو سێ لۆكەیشنا ئەكتەر ب دەستەكێ جلكایە.
هەروەسا گۆت: هندەك جاران من فلم دیتینە لۆكەیشن و جلكێن وان ب چو رەنگان ل گەل ئێك نە دگونجاینە و دبینم رەنگێ جلكان گەلەك كارتێكرنا خۆ هەیە ل سەر ئەكتەری و ئەو رەنگە بەحسێ هندێ دكەت یا دسەرێ ئەكتەری دا.
