ل دھۆکێ جوانکاریێ بۆ وەلاتیان ب خوینا وان دکەن
ئەڤرۆ نیوز:
تایبەتمەندێ نەخۆشیێن پیستی و جوانکاریێ ل سەنتەرێ نازێ دیارکر کو ل پارێزگەھا دھۆکێ دەست ب جۆانکاریێ یا ھاتیە کرن ب رێیا خوینا مرۆڤی بۆ جوانکرنا سەروچاڤ و چاندنا پرچێ، ئەڤ جۆرێ جۆانکاریێ یێ ب خوینا مرۆڤی بۆ مرۆڤێ دھێتە کرن ژ ھەموو جۆرێن دی یێن جوانکاریێ باشترە و چو زیان ژێ ناگەھنە وەلاتیان، چونکو خوینا وان ب خوە دھێتە بکارئینان بۆ جوانکرنێ، ب تایبەتی ژی بۆ راستکرنا قورمچووکێن سەروچاڤ و چاندنا پرچێ، ھەکە خوینا وەلاتی ب خوە بیت بۆ وی بھێتە بکارئینانا گەلەک باشترە ژ ھەموو ریێن دێ یێن دھێنە ئەنجامدان.
د. رەعەد عەبدولرەحمان عەبدولا تایبەتمەندی نەخۆشیێن پیستی و جوانکاریێ بۆ ئەڤرۆ دیارکر کو ل وەرزێ ھاڤینێ نابیت وەلاتی گەلەک بچنە بەر ھەتاڤێ چونکو زیانێن مەزن دگەھینیتە سەروچاڤێن مرۆڤێ ب تایبەتی ژی ئەو وەلاتیێن دەمێ تەماشەی ھەتاڤی دکەن و سەروچاڤێن خوە دگرن ل ڤێدەرێ قورمچووک گەلەک زێدە دبن ل سەروچاڤێن وان وەلاتیان و رەنگێ دێمێ مرۆڤێ تاری دبیت و گەلەک زیانێن دێ گەھینیتە وەلاتیان ب تایبەتی ژی دەمژمێر 11:00ی سپێدی ھەتا 15:00 نیڤرۆ ھەتاڤ گەلەک یا ب مەترسیە چونکو د ڤێ دەمی دا جۆرەکێ مەترسیێ دبیژنێ بێ دەرکەڤیت و تیرۆژکێن ھەتاڤی زێدە دژوار دبن.
د. رەعەد عەبدولرەحمان گۆتژی: “نوکە قورمچووکێن سەروچاڤ و دێمی مرۆڤی ب رێیا دەرمانان دھێنە راستکرن، ئەڤە ژی بۆ ماوی چەند ھەیڤان دمینیت ئەو ژی ھەکە وەلاتی ل دەڤ نوشدارێن تایبەتمەند چێکەن و ھندەک کەس سەروچاڤێن خوە پڕ دکەن ب دەرمانێ ئەڤە بۆ ماوی سالەکێ ھەتا دو سالان دمینیت ئەو ژی ل دووڤ جۆری دەرمانی و سالوخەتێن وێ دمینیت، لێ نوکە ب رێیا ھندەک دەرزیکا سەروچاڤ دھێنە راستکرن ئەڤە پێدڤی نشتەگەری نینە بەری نوکە ب رێیا نشتەگەریا سەروچاڤان دھاتنە راستکرن و جۆانکرن لێ نوکە بێی نشتەرگەری ل دھۆکێ سەروچاڤ دھێنە جۆانکرن و راستکرن و پتر کچ دێمێ خوە جوان دکەن.
تایبەتمەندێ نەخۆشیێن پیستی و جوانکاریێ ل سەنتەری نازێ راگەھاند کو ل پارێزگەھا دھۆکێ دەست ب جۆرەکی دی یێ جۆانکاریێ بۆ وەلاتیان یا ھاتیە کرن ئەو ژی ب رێیا خوینێ دێ نوشدار خوینێ ژ مرۆڤی کێشیت و دێ پاقژ کەت و جارەکا دی ئەو خوین دێ بۆ جوانکاریێ ھێتە بکارئینان، ئەڤ جۆری جوانکاریێ گەلەک باشترە ژ جۆر و رێیێن دی یێن جوانکاریێ، ئەڤە ژی ب رێیا چار روونشتنا بۆ مرۆڤی دھێتە کرن کو ناڤبەرا سێ حەفتیان ھەتا ھەیڤەکێ ڤەدکێشیت.
ناڤبری ئەو ژی دیارکر کو ئەو وەلاتیێن دەستێن وان دبنە قورمچووک گەلەک باشترە ب رێیا خوینا خوە جۆانکاریێ بۆ خوە ئەنجام دەن، ھەروەسا ژی وەریانا پرچێ ژی باشترە مرۆڤ خوینا خوە بکار بینت بۆ چاندنا پرچا خوە، چو مەترسیی تێدا نینە ب تنێ ئەو وەلاتیێ ئێشا خوینێ ھەبیت ئەم نەشێین بۆ وی وەلاتی خوینا وی بکاربینین بۆ چوانکرنا سەروچاڤ و چاندنا پرچا وی.