ل دۆر ئاریشەیێن وەرگرتنا گەنمی شاندەكێ ئیراقێ سەرەدانا سایلۆیێن كوردستانێ كر
زاخۆ، عەلی حاجی:
شاندەكێ هەڤپشك یێ حوكمەتێن هەرێما كوردستانێ و ئیراقێ ب مەرەما ژ نێزیك ئاگەهداربوون ل سەر چاوانیا وەرگرتنا گەنمێ جۆتیاران و ئاریشەیێن وان، سەرەدانا سایلۆیێن هەرێما كوردستانێ كر.
سەلمان محەمەد، رێڤەبەرێ گشتی یێ چاندنێ ل ئیدارەیا سەربخوە یا زاخۆ بۆ رۆژناما ئەڤرۆ دیار كر، مەرەم ژ سەرەدانا وی شاندی ئەو بوو، ژ نێزیك ئاگەهداری پرۆسا وەرگرتنا گەنمی ل سایلۆیا زاخۆ و ئەو كێماسیێن د پشكا وەرگرتنا گەنمێ جۆتیاران دا هەی ببن، وی شاندی سۆز دا ژ لایێ خوەڤە ئاریشەیێن وان بەرچاڤ بهێنە وەرگرتن، دیسا ئەو ئاگەهدار بوون، كو گەنمێ جۆتیاران ب شێوەكێ رێكوپێك دهێتە وەرگرتن».
ناڤبری گۆتژی: «داكو ئەو شاندە ژ نێزیك ڤە ئاگەهداری ئاریشەیێن جۆتیاران بیت، مە برە دەف بەرهەمێ هندەك جۆتیاران، كو ئەو بەرهەمە د ناڤ زەڤیێن وان دا مایە و نەشێن بەرهەمێ خوە رادەستی سایلۆیا زاخۆ بكەن، ژ بەر كێمیا پشكا وەرگرتنێ ژ گەنمێ جۆتیاران، د نوكە دا ئەم چاڤەرێ حوكمەتا هەرێما كوردستانێ دكەین، كو ئەو رێژەیا هاتیە دەستنیشان كرن ل سایلۆیا زاخۆ بهێتە وەرگرتن، كو ٢٠ هزار تەنێن گەنمی نە، ئەو رێژەیە بهێتە زێدەكرن».
