ل دۆر بارێ ئابووری و گهنگهشهیا نه بهر ئاقل
ڤان رۆژان گهنگهشه ل سهر بارێ ئابووریێ ههرێما كوردستانێ گهرم بوون و ههر ئێك وهسا خۆ دیار دكهت كو وی دهستێ خۆ یێ دانایه سهر وێ ئێشێ و یێ دهرمانا بۆ د نڤیسیت ، نهمازه دهمێ مرۆڤ هندهك دیدار و چاڤپێكهفتنێت تهلهفزیونی دگهل هندهك بسپۆر و شارهزایێت بارێ ئابووری !! دبینیت.
لێ كهس ئاماژێ ب وێ چهندێ ناكهت ، ئهڤه 25 سالێت حوكمڕانیێ ل هه رێمهكا دهولهمهند و زهنگین ، كا مه د وان ههمی سالا دا چ بۆ ئابوورا ههرێما كوردستانێ كریه ؟ كا ئهو كارگههێت مه بۆ ههمی پێدڤیێت خۆ داناین ؟ ژ كارگههێت ئاسنی و چیمهنتۆیێ بگره ، ههتا د گههیته كارگههێت قودیكێت مهعجوینێ تهماتێ و داگرتنا فێقی ، كو كوردستان ب ڤان كهرهستهیان گهلهك دهولهمهند و زهنگینه. كا وارێ مهیێ چاندنێ ، كو ههر وهكی شارهزا دبێژن ئاخا كوردستانێ زێڕه ؟ ههتا نها ژی ههكه فێقی و زهرزهوات بۆمه ژ تركی و ئیرانێ نههێت ، مه قهفتهكا كهرهفسێ نابیت دگهل فراڤین و شیڤێت خۆ بخۆین.
كا كارگههێت مه یێت ب خودان كرنا مریشكا و بهرههم ئینانا هێكا ؟ كو د ڤیا مه هند بهرههم ئینابا ، نهكۆ تێرا كوردستانێ كربا ، بهاكۆ مه هنارتبا ژ دهرڤه.
كا پویته دانا مه ب گهشت و گوزاری و چاڤدانا سروشتێ جوانێ كوردستانێ، دا وه بكهین بهرێ خهلكی بكهڤیته كوردستانێ.
ما ئهڤه ههمی نه كارێ حكوومهتا كوردستانێ یه نهخاسمه وهزارهتێت پهیوهندیدار، وهكی وهزارهتا چاندنێ و سنعهتكاریێ ، ما پێدڤی دكهت سهرۆك وهزیران ( ههما كی بیت ) بدهستێ خۆ ڤان تشتان بكهت ؟
دهمێ هندهك شارهزایێت !! ئابووری !! وهسا شیرهتان ل حكوومهتێ دكهن، كو مهعاشا كێم بكهن یان ب نیڤی بدهن، چنكی هژمارا وان یا زێدهیه ، ما بۆچی شیرهتا وان ئهو نابیت بێژنه جهنابێ سهرۆك وهزیران، كو فهرمانبهر و مهعاش خۆرێت بن دیوار، ب فهرمانهكێ ههمیان فهصل بكهت، ههما یێت كێ بن و كێ دامهزراندبن و ل بن كیژ دیواری بن، چنكی دێ هژمارا فهرمانبهرێت كوردستانێ بیته 700 هزار یان كێمتر یان زێده تر ل جهێ ملیۆن وچارسهد هزارا و مه ئاڕێشا دانا مهعاشا نامینیت. دڤێت بهری ههمی تشتا ئهو شارهزایێت!! سهر تهلهفزیونا بێژن كا كێ ئهڤ بن دیواره دامهزراندینه و بۆچ مهرهم هاتینه دامهزراندن؟ ما ئهڤه ژی نه جۆرهكێ دیارێ گهندهلیێ یه؟.
تشتێ ژ ههمیان فهرتر بێته گۆتن ئهوه كو ئاماژه ب گهندهلیێ بێته كرن ، ههتا نوكه مه نهزانیه ئهڤه 25 ساله ههلویستێ حكوومهتێ بهرامبهری گهندهلیێ چیه؟ و كی سهرا گهندهلیێ هاتیه لادان؟ ههر دهمێ مه شیا رێ ل گهندهلیێ بگرین ل فهرمانگههێت میری و دهرڤهی فهرمانگهها، دێ بینین كو داهاتێ مه، نه ههر دێ تێرا مه كهت، بهلكۆ دێ د سهردا چیت.
ل دویف هزرا من نابیت ب چو رهنگهكی دهستكاری د مهعاشێت فهرمانبهرا دا بێته كرن وچو رێژێ ژێ نه ئیننه خوار، نه 30% و نه 50% و نه وێڤه تر ، بهلكۆ دوو مهعاشی و سێ مهعاشیێ ببڕن و بن دیواریێ ببڕن، ههر وهك هاریكاری بۆ خهلكێ مه. بلا ههول بێنه دان بۆ ئهرزانكرنا كهلوپهلا و كرێ یێت خانیا و شوققا و كرێیا ئاڤێ و كارهبێ.
بلا شارهزایێت ئابووری!! ل پشتا خهلكی باخڤن و بهڕهڤانیێ ژێ بكهن و راستیا بۆ حكوومهتێ بهرچاڤ بكهن، نهكۆ ههوڵ بدهن مهعاشێت وان كێم بكه ن، و بارێ وان گرانتر لێ بكهن.
فهرمانبهرێت كوردستانێ ئهڤه 5 ههیڤه مهعاش نه وهرگرتینه، بلا ئهو شارهزا!! شیرهتا ل حكوومهتێ بكهن، كا دێ چهوا وان مهعاشا دهته فهرمانبهرا، نهكو پشتی 5 مهها ژنوی مهعاشێت وان كێم بكهن.
