ل دێره‌لۆكێ گرنگی ب چاندن و به‌رهه‌مێ ناڤخوه‌یی دهێته دان
ئامێدیێ، مه‌حمود نهێلی
به‌رپرسه‌كی چاندنێ ل دێره‌لۆكێ دیار كر كو ئه‌ڤ ساله پتر ژ 800 دۆنه‌مێن ئه‌ردی بۆ چاندنا كونجیان ل دێره‌لۆكێ هاتبوونه بكارئینان و داهاته‌كێ باش بۆ جۆتیارێن ده‌ڤه‌رێ به‌رهه‌م ئینایه.
ئه‌ندازیار عسمه‌ت ئیراهیمن به‌رپرسێ هوبا چاندنێ ل ناحیا دێره‌لۆكێ بۆ رۆژناما ئه‌ڤرۆ خویا كر كو ل سنوورێ وان چاندنا كونجیان سال بۆ سالێ یا زێده دبیت، ژ به‌ر كو به‌رهه‌مێ وێ یێ باشه و تاما وێ ژی یا خوه‌شه و گۆت: “ئه‌ڤ ساله پتر ژ 800 دۆنه‌مێن كونجیان هاتبوونه كرن”.
ناڤهاتی ئاشكرا ژی كر كو چه‌مێن ده‌ڤه‌رێ سیسته‌مه‌ك یێ هه‌ی و دكه‌نه دو كه‌رت، كه‌رته‌ك بۆ چاندنا كونجیان و كه‌رته‌ك ژی بۆ چاندنا برنجی دهێته بكارئینان و گۆت: “ئه‌و ئه‌ردێ مایی ژی بۆ چاندنا به‌رهه‌مێن دیتر هاتبوو بكارئینان”.
ناڤهاتی داخواز ژ هه‌موو جۆتیارێن ده‌ڤه‌رێ كر كو پتر گرنگیێ ب چاندنێ و به‌رهه‌مێ ناڤخوه‌یی بده‌ن، ژ به‌ر كو نوكه پتر وه‌لاتی ژی گرنگیێ ب به‌رهه‌مێن ناڤخوه‌یی دده‌ن.
ل گور وان زانیاری و داتایێن ته‌خمینی یێن ب ده‌ست رۆژناما ئه‌ڤرۆ كه‌فتین، جهێ هه‌ر دۆنه‌مه‌كا ئه‌ردی دۆرێن 250 كیلۆیێن كونجیان لێ به‌رهه‌م دهێن و هه‌ر كیلۆیه‌كا كونجیان ب تایبه‌تی یێن ده‌ڤه‌رێ ب پێنج هزار دیناران دهێته فرۆتن، ب ڤێ یه‌كێ ژی داهاتێ هه‌ر دۆنه‌مه‌كا ئه‌ردی دبیته ملیۆنه‌ك و 200 هزار دینار و بهایێ كونجیێن 800 دۆنه‌مێن ئه‌ردی دبیته دۆرێن ملیار دیناران.
