ل دێرەلۆكێ و شێلادزێ پتر ژ 1500 دۆنەمێن ئەردی بۆ چاندنا برنجی دباشن
ئامێدیێ، مەحمود نهێلی
ل هند چەمێن سنورێ ناوچەداریا دێرەلۆك دەست ب چاندنا برنجی هاتە كرن كو سالانە پتر ژ 600 دونەمان ل ڤێ دەڤەرێ بۆ برنجی دهێتە بكار ئینان و سال بۆ سالێ بەرێ جوتیاری پتر دكەڤیتە چاندنا ڤی بەرهەمی، لێ جوتیارێن دەڤەرێ گازندا ژ نەبوونا خزمەتگوزاریان و داخوازا هاریكاریێ ژ حكومەتێ دكەن.
رەشید گەلەكی ئێك ژ جوتیارێن سنورێ ناوچەداریا دێرەلۆك بو رۆژناما ئەڤرۆ دیار كر، چاندنا برنجی ل ڤێ دەڤەرێ بوویە كارێ وان یێ سالانە و هەموو سالەكێ ئەو زەڤیەك یان چاند زەڤیێن برنجی ل ڤان چەمان دچینن و گۆت: پشتی ئاڤ دهێتە چەمی ل وەرزێ بهارێ دەست ب چاندنا برنجی دهێتە كرن و چاندنا برنجێ كوردی ژ گەلەك قوناغان دەرباز دبیت و د بەرێ دا ب ئاژەلان و گایان جوت دهاتە كرن و زەڤی دهاتنا شێلان، لێ نوكە ب ساناهیتر یێ لێ هاتی و رۆژەكێ بەری زەڤیێ دێ هێتە كولان و پاشان دهێتە ئاڤدان تا روبسیت و هەر ب تەراكتورێ دهێتە شێلان و رۆژا پاشتر ب زبارە و هەبوونا پتر ژ 10 جوتیاران دناڤ دا كوم دبن و دەست ب بێنانا زەڤیێ دهێتە كرن و پاشان دهێتە توڤكرن و چەندین قوناغێن دیتر دەرباز دبیت تا دهێتە درین و دگەهتە بەرهەمی.
و گۆت: ئەڤە رزقێ سالانە یێ جوتیاری یە و كارێن باب و باپیرێن مەیە و پێدڤیە ئەم ژی دەستان ژێ بەرنەدەین و نوكە داهاتەكێ باش لێ بەرهەم دهێت.
جوتیارەكی دی ب ناڤێ عەبدوللا دێرەلۆكی دیار كر، نوكە چاندنا برنجی ل گەلەك دەڤەران دهێتە كرن و گۆت: ئێك ژ ئاریشێن مە ئەوە كەرەستێن چاندنێ گەلەك گرانبووینە و بهایێ كیمیایێ ئێكجار بلند بوویە.
ژ بەر وێ یەكێ ناڤهاتی داخاز كر، هاریكاریا جوتیاری بهێتە كرن وەك تراكتورێ و گازویلێ و دەراسان و ماكینێن گێرا و كیمیایێ ، چونكە چاندنا برنجی مەزاختنەكا زۆر لێ دچیت و ئەڤە زێدەباری كرێكاران كو ب پالەتی و زبارە كار دكەن، هەكە جوتیار تێهەل ناهێت وی پارەی هەموویێ ب مەزێخت.
ناڤهاتی دبێژیت: تۆڤێ نوكە هاتینە گوهارتن و نوكە ریتكێ درێژ دهێتە چاندن و بەرهەمێ وێ گەلەك باشترە ژ توڤێن بەری نوكە و سالانە پتر ژ 100 تەنەكێن برنجی ئەو بەرهەم دئینت و پتریا وی برنجی ژی دهێتە فرۆتن و حەزا خەلكی ژی پتر یێ ل سەر برنجێ كوردی هەی ژیێ بیانی دا.
ئەندازیارێ چاندنێ ئەیاز حسێن دیار كر، ل سنورێ ناوچەداریێن دێرەلۆك و شێلادزێ پتر ژ 1500 دونەمێن ئەردی ب كێر چاندنا برنجی دهێن و سالانە پتر ژ 650 دونەمان دهێنە چاندن و گۆت : (ژ بەر وێ یەكێ كو ل دەڤەرا مە ئەردێ ئاڤی هەیە جوتیارێن مە ب رەنگەكی باش برنجی دچینن و تایبەت ئەڤە هەیاما هەشت سالایە هێردی هێردی جارەكا دی چاندنا برنجی بەرەڤ زێدەبوونێ دچیت بتایبەتی ژی ئەڤ سالە ژ سالێن چویێ دێ گەلەك باشتر بیت).
دەربارەی گرنگیا چاندنا برنجی ژی ل دەڤەرێ ناڤهاتی دیاركر، برنجێ كوردی مفایەكی باش تێدا هەیە ژلایێ ساخلەمیێ و پروتینا ڤە، هەروەسا جوتیار دشێت ب چاندنا برنجی قازانجەكی باش یێ ئابووری بكەت ژ هەموو لایەكی ڤە بگرە ژ لایێ مادی ڤە دێ ب بهایەكی باش دهێتە فرۆتن، و هەروەسا زەڤیێن چاندنێ ژی دهێنە یاقژكرن پشتی ب برنجی دهێتە چاندن ئەو گیا و كەرەستەیێن خراب دناڤ زەڤیان دان نامینن.
