ل دێرەلۆکێ پتر ژ پار خەلکی دەست ب چاندنا برنجی کریە

ئه‌ڤرۆ نيوز:

ژ ئەگەرێ بەردوامیا قەیرانا ئابووری و رەوشا مووچەی و نەبوونا سەقامگیریێ د بلندبوونا بھایێ دۆلاری و کەرەستەیێن خوارنێ دا، خەلک ژ گرانبوونا بھایێ ئاھێن خوارنێ دترسیت، لەو ئەڤ سالە ھژمارەکا زۆرا وەلاتیێن سنوورێ ناحیا دێرەلۆکێ دەست ب چاندنا برنجی کریە و پتر ژ سالا بۆری.
عسمەت ئیبراھیم، بەرپرسێ ھۆبا چاندنێ ل ناحیا دێرەلۆکێ بۆ ئەڤرۆ دیار کر کو ل سنوورێ ھۆبا وانا پتری ھزار و 500 دۆنەمێن ئەردی ب کێر چاندنا برنجی دھێت ھەنە، لێ ھەموو ناھێتە چاندن و گۆت: ئەڤ سالە رێژەکا پتر ژ پار یا برنجی دێ ھێتە چاندن، ژ بەر کو ھەر نوکە جۆتیاران دەست ب چاندنێ کریە، دیسا گەلەک جۆتیار بۆ چاندنێ قەستا چەمێن دەڤەرێ دکەن، ب تایبەتی ژی چاندنا برنجی و کونجیان، جۆتیار ژی ئەگەرێ سەرەکی یێ چاندنا برنجی بۆ بەردەوامیا قەیرانان و گرانبوونا بھایێ کەرەستێن خوارنێ و کێمیا مووچەی ڤەدگەڕینن.
عسمەت ئیبراھیم خویا ژی کر، ترسا خەلکی ئەوە کو وەکو سالێن بەرێ لێ بھێتە ڤە و کەرستێن خورانێ پتر گران ببن و گۆت: بەری نھا رەوشا خەلکی یا باش بوو، لەو خەلکی گەلەک برنج نەدچاند، لێ نھا جارەکا دی رەوشا وەلاتیان نەیا باشە، شۆل نینە، مووچە نینە و پارە یێ کێمە، لەو خەلک یێ نەچارە دەست بکارێن دیتر یێن چاندنێ بکەن.
سەگڤان عەبدوللا، جۆتیارەکێ دەڤەرێ یە زێدەباری دیارکرنا باشی و خوەشیا برنجێ کوردی، داخوازێ ژ حوکمەتێ دکەت کو پتر گرنگیێ ب کەرتێ چاندنێ و جۆتیاری بدەت و گۆت: پێدڤیە برنج ھەر ل ڤان چەمان بھێتە کرن، چونکی برنجێ کوردی کو ل ڤان چەمان دھێتە کرن، ل بازاڕی ژ ھەموو جۆرێن دی یێن برنجی ب بھاتر و خوشترە، لەو پێدڤیە حوکمەت ژی پتر گرنگیێ ب ڤی کەرتی بدەت و جۆتیاری پالدەت بۆ کارێ چاندنێ و توڤ و کەلوپەلێن چاندنێ بۆ جۆتیاری دابین بکەت، بۆ ھندێ کو کارێ چاندنا برنجی ل ڤێ دەڤەرێ نەھێتە راوەستاندن.
عسمەت ئیبراھیم، بەرپرسێ ھۆبا چاندنا ناحیا دێرەلۆکێ ئاماژە ب وێ چەندێ ژی کر، ئەو بەردەوام و بۆ ھەر کارەکێ چاندنێ دێ ھاریکاریا جۆتیاران کەن و گۆت: ئەو کەسێ ب کارێ چاندنا برنجی رادبیت، ئەم دێ دەرمانێن دژی گیایێ ناڤ برنجی و دژی کرموکێزان دەینێ، دیسا ب دەرمانێ قەلەوکرنێ یێ کێمیایی دێ ھاریکاریا وی کەین و ھەر دەمەکێ پێدڤی ب مە ھەبیت دێ چینە پێش و دێ بۆ ئێش و نەخوشیێن تووشی برنجێ وی ژی دبن چارەسەر کەین و ئەگەر چ نەبیت بۆ بکەین دێ رێنمایان پێشکێشی جۆتیاران کەین.
عسمەت ئیبراھیم، داخواز ژ جۆتیارێن دەڤەرێ ژی کر، دەستان ژ چاندنا برنجی بەرنەدەن، ژ بەرکو داھاتەکێ باشە و جۆتیار دێ شێت مفایەکێ باش ژێ وەرگریت.

کۆمێنتا تە