ل دەستپێکا شۆرەشا ئیلۆنێ گەلیێ زاخۆ هاتـە ستانـدن
ديدار، سالار محةمةد دۆسكى:
2 – 3
شەرێ چیایێ (مەیتن) نەخوشترین شەر بوو و ئەم گەلەك گران شكەستین و هێزەكا مەزن یا دوژمنی هاتبوو دەڤەرێ و دەمێ ئەم شكەستین مە ئومێد نەما و نە كێشا چەند رۆژەكا رێكخستنەكا باش دناڤا هێزێن پێشمەرگەیێ كوردستانێ دا هاتەكرن و ئەم شیاین بەر سینگێ دوژمنی بگرین و سەركردێن پێشمەرگەی دناڤا گولی و سندی و سلێڤانەی یا هەر هەمی هاتنە دەڤەرێ و عیسێ سوار هاتە دەڤەرێ بهێزەكا مەزن ڤە و ی دەمی دوژمنی ئەو جادا دچوو كانی ماسێ ژ مە وەرگرت بوو و ب هاتنا وێ هێزا مەزن یا پێشمەرگەی ڤە مورالا پێشمەرگەی گەلەك بلند بوو و هەر هێزەكا پێشمەرگەی ل دەڤەرەكێ با و ئەگەر (20) پێشمەرگە هەبانە (10) هێلان و (10) ئینانە شەرێ (مەتینی) چونكە وی دەمی هزرێن حوكمەتا بەعس ئەو بووینە بچنە سەر سنورێ توركی و دەڤەرێن سندی و گولیا و سنوری هەمیێ بگرن، ب هاتنا ئەوێ هێزا پێشمەرگەی و ب هێزا خودێ و رێكخستنەكا باش هاتەكرن ئەو هێزا دوژمنی گەلەك زووی شكەستن و گەلەك دژوار شكەستن و هەتا ئەوا جندیێن ئیراقێ پێلێن خوە ئانكو پستال هێلان و پێخاس رەڤین و گەلەك چەكێ وا ما د دەستێ پێشمەرگەی دا و رەڤ ب دەست نە كەفت هەتا گەهشتینە بامەرنێ و مورالا پێشمەرگێ مە گەلەك بلند بوو و شیاین سەركەفتنەكا مەزن سەر دوژمنی تۆمار بكەن و ئەڤە ژ ئەنجامێ رێكخستن و ئێكگرتن و هێزا مەزن یا پێشمەرگەیێ هەمی دەڤەرا بوو.
پێشمەرگەیێ هەر دوو شۆرەشێن ئیلۆن و گولانێ هەروەسا گۆت: شەرێ 1963 دسپێكەكا هەرە مەزن بوو بۆ سەركەفتێن پێشمەرگەی و ئێدی حوكمەتا بەعس گەلەك لاواز بوو و ئێدی خوە فرۆكە ژی نەدهاتنە دەڤەرێ و ئەڤجا پێشمەرگە گاڤ بۆ گاڤێ بهێز كەفت و دهاتە دەڤەرێ و سەركەفتن ل دووڤ سەركەفتنێ و هەتا شەرێ زووك و هندرین حوكمەتا بەعس نەچار بوو و چ رێك نەمان چونكە ب چەكی نەشیا شۆرەشا كوردی ب راسوستیان و هاتە سەر مێزا دانوستاندنا و داخازا رێكەفتنێ كر ل گەل شۆرەشا ئیلۆنێ.
هەمان پێشمەرگە گۆت: ل بەیانا 11ی ئادارێ ئەز ل گوندی بووم و دەمێ گۆتین كورد و عەرەب پێكهاتن وی دەمی گەلەك دلێ من خوش بوو و نەبتنێ دلێ من بەلكو یێ هەمی خەلكێ كوردستانێ و مە هزر كر ئێدی شەر ب دووماهی هاتن و رێكەفتن دناڤبەرا مللەتێ كورد و حوكمەتا بەعس دا دروست بوو و ئێدی بۆ تەناهی و ئارامی و خوشی و روندكێن كەیف خوشیێ هاتنە خوار و مە زانی ئەڤە بەرهەمێ خوینا چەندین شەهیدێن شۆرەشا ئیلونێ یە و ئەڤە بەرهەمێ ماندیبوونا پێشمەرگێ كوردستانێ یە و ئەڤە بەرهەمێ سەركردایەتیا شۆرەشا ئیلۆنێ یە ب سەر پەرشتیا بابێ مەزن ( مەلا مستەفا بارزانی) جارا ئێكێ بوو حوكمەتەكا داگیركەر دانپیدانێ ب مافێن مللەتێ كورد بكەت و بهێتە سەرمێزا دانوستاندنا و داخاز بكەت هەوە چ ڤێت مللەتێ كورد چ ڤێت و ب مەرجێن شۆرەشێ رازیبت و ئەڤە نەبتنێ سەركەفتن بوو بۆ باشورێ كوردستانێ بەلكو رێكەفتنا 11ی ئادارێ دەسپێكا سەركەفتنەكا مەزن بوو بۆ هەر چار پارچێن كوردستانێ و مورالەكا مەزن یا پێشەرگەی دروست بوو وی دەمی گەلەك دلێ خەلكێ كوردستانێ خوش بوو و هەر ل هەمی دەڤەران دەوات بوو و كەیف بوو و ستران و دیلان بوون و بەرهەمێ شۆرەشێ هات و مە هەمیان ب چاڤێن خوە دیت و ئێدی خەلكێ كوردستانێ ب سەربەست هاتن و چوون دكر و هەر دەڤەرەكا ڤیابا چووبایێ.
هەمان پێشمەرگە گۆت: نەخوشترین رۆژێن ژیانا من ئەو بوو دەمێ سالا 1975 و پێشمەرگە شكەستین و ئێدی ههیڤی و ئومێد نەماینە و مە هزر كر دوزا مللەتێ كورد ب دووماهی هات و ئەم چووینە ئیرانێ ئەو رۆژ چ جاران ژ بیرا من ناچن و نەخوشترین رۆژێن ژیانا من بووینە، ل سالا 1991 دەمێ سەرهلدان دروست بووی و هەمی بارەگایێن ئەمنێ و حزبا بەعس هاتینە سوتن و پێشمەرگە هاتیە باژێران دا و دەنگێ سترانێن شڤان پەروەر بلند بووین ئەڤە خوشترین رۆژێن ژیانا من بووینە و نەبتنێ یان بەلكو یا هەمی خەلكێ كوردستانێ و سەرربلند و سەرفەرازم ب ئەڤان رۆژان و و ئەڤە بەرهەمێ خەباتا پێشمەرگێ كوردستانێ یە ب سەرۆپەرشتیا جەنابێ سەرۆك (مەسعود بارزانی) ئەم سەربلندین وەك پێشمەرگە ب ئەڤان بەرهەمان، دیسا ل سالا 2003 دەمێ رژێما بەعس ەفتی و شكەستن خواری ئەو ژی دهێتە هەژمارتن خوەشترین رۆژێن ژیانا مە و دەمێ مە دیتی ئەو مرۆڤێ زولم و زورداری ل مللەتێ مەكری و شكەستن خواری و كەفتیە دكونجارا وەك مشكا درەڤی و دووف دا هاتیە سێدارە دان ئەڤە ژی خوشترین رۆژێن ژیانا هەر كوردەكی نە یێ ل سەر ئەڤێ ئاێ دژیت چونكە مللەتێ مە گەلەك زولم و زورداری وستەما رژێما بەعس دیت بوو و و گەلك نەخوشی دیت بوو ن و سوتنا گوندان و كێمیابارانكرن و ئەنفال و و كوشتن و زیندانكرن و هەر چ نەمایە ئەڤێ حوكمەتا بەعس ل گەل مللەتێ كورد نەكری و چ دلوڤانی نەبوو .هەمان پێشمەرگە گۆت: ل سالا 1974 ئەم ل بێسرێ بووین (سەلیمێ ئەسعەد) ل فرۆكخانێ بوو و گەلەك سەركردێن پێشمەرگەی و ئامر سری ل دەڤەرێ بوون و هەتا سالا 1974 مە نەهێلا حوكمەتا بەعس ئێك پێنگاڤ ل دەڤەرێ ب هاڤێژیت، دیسا چیایێ پیرۆەرا ژی هێزەكا مەزن یا پێشمەرگەی رێكێ دا بوو و حوكمەت نەشیا ب چ رەنگان بهێتە دناڤا دەڤەرێ دا و هەر هەمی جه لێ هاتبوونە گرتن و هێزەكا مەزن یا پێشمەرگەی ل دەڤەرێ بوو و مورالەكا مەزن هەبوو وی دەمی (عەلیێ خەلیل) و (عەبدوالرزاق گەرماڤی دۆسكی) جێگرێ وی بوو بارەگایێ وان ل گوندێ (شاوریكێ) بوو ل دەڤەرا دۆسكیا (سەلیمێ ئەسعەد) ل بازێ بوو.
