ل دەمێ چێکرنا پارکا ناڤ بازاری ئەڤ ئاڤاھیە ناھێنە خرابکرن
ئه‌ڤرۆ نيوز:
سەرۆکێ باژێرڤانیا دھۆکێ ئاشکراکر، ل دووڤ پلانا ستی سەنتەر ئەوا بۆ باژێرێ دھۆک ھاتیە دانان، چو جھێن شوونواری یێن دکەڤنە د ناڤا پارکێ دا کو د نەخشێ ستی سەنتەر دا ھاتینە دانان ناھێنە خرابکرن و ژناڤبرن و گۆت: خودانێن خانیێن تاخێ فەلا نێزیک (قەسر کەنبلان) ژی دشێن خانیێن خوە ئاڤا بکەن.
ئەندازیار ئیحسان یەحیا ئوسمان سەرۆکێ باژێرڤانیا دھۆکێ د ھەڤدیتنەکێ دا ل گەل رۆژناما ئەڤرۆ گۆت: خرابکرنا ئاڤاھیێ ئامادەیا کاوە چو راستی بوونینە، ئەڤ ئاڤاھیە ئێک ژ وان جھان کو خەلکێ پارێزگەھا دھۆک ھەموو شانازیێ پێ دبەت کو چەندین جیل تێدا ھاتینە پەروەردەکرن و خواندینە و بوویە جھەکێ زانستی روویێ شارستانیێ باژێرێ دھۆکێ، ژیێ ڤی ئاڤاھیی نێزیکی حەفتێ سالانە و ب چو رەنگان دەستکاری د ڤی ئاڤاھی دا ناھێتەکرن، بەلکو بەرۆڤاژی دھێتە چاڤدان و سەخبێریکرن وەک مەلبەندێ فێربوون و زانستێ ل پارێزگەھا دھۆکێ و پتریا خەلکێ ڤی باژێری د ڤی ئاڤاھی ڤە خواندینە.
ئەندازیار ئیحسان یەحیا ئوسمان سەرۆکێ باژێرڤانیا دھۆکێ ئەو ژی ئاشکراکر، چێکرنا پارک و جھێن راوەستاندنا ترۆمبێلان جھێن تایبەت ھەنە و ل دووڤ ماستەر پلانا باژێرێ دھۆکێ ھەموو جە ل بەرچاڤ ھاتینە وەرگرتن، دیسا د ناڤا پلان و نەخشێ ستی سەنتەردا پارک ھاتیە چێکرن و دو ئاڤاھیێن ھەرە مێژوویی دھۆکێ کەتینە تێدا و چو دەستکاری تێدا ناھێتەکرن و ھەر ناھێنە خرابکرن، بەلکو دێ مینن وەک مێژوو و روویێ شارستانیێ دھۆکێ، ئێک ئاڤاھیێ گەلەریا دھۆک کو ئاڤاھیێ دادگەھا کەڤنا دھۆکێ یە و ھەر دێ وەک خوە مینت، دیسا ئاڤاھیێ سانەویا دھۆکێ کو ئاڤاھیەکێ کەڤنە و بەرنیاسە ب ئاڤاھیێ پەیمانگەھا ھونەرێن جوانێ بەرێ کو دکەڤنە دنیڤا پارکێ دا وەک جھەکێ مێژوویی ل گەل ئاڤاھیێ ئامادەیا کاوە یا کورانا نموونەی ئەڤە ھەموو دێ وی چارچووڤەی دا دێ وەک خو مینن و دەست کاری تێدا ناھێتەکرن و دێ پاراستی بن و ئەڤە دێ کەڤنە دناڤا پارکێ دا، دیسا ھەتا ھندەک جھێن د ھەنە و ب مەرەما پاراستنا ئەڤان جھان ھەر چو دەستکاری تێدا ناھێتەکرن بەرۆڤاژی دێ پاراستی بن وەک (قەسرا کەنبلان) و خانیێن فەلان ئەڤە دێ ھەموو وەک خوە مینن
ئەندازیار ئیحسان ئوسمان سەرۆکێ باژێرڤانیا دھۆک نەڤەشارت و گۆت ژی: خانیێن کولانێن فەلا کو نێزیکی قەسرا کەنبەلان خودانێن وان دشێن ئاڤا بکەن و نوکە ژی دشێن لێ دڤێت ل دووڤ نەخشێ باژێرڤانیا دھۆکێ بیت و مێژوو یا پاراستی بیت ب شێوازێ دھۆکا کەڤن بھێتە ئاڤاکرن.
سەرۆکێ باژێرڤانیا دھۆکێ ئەو ژی ئاشکراکر کو ھەتا پازدە پرۆژێن مەزنێن باژێرڤانیێ ھاتینە راوستاندن و ئەڤە ژی ژ بەر قەیرانا دارایی یا ئابووری کو ھەرێم تێدا دبوریت، لێ ب رێیا رێکخراوا بزاڤێ دھێنەکرن بەردەوامی ھەبیت و کار ل سەر ھندەک پرۆژان یێ بەردەوامە.
