ل دەمەکێ نێزیک دێ نووترین بەرهەمێ خوە بەلاڤ کەم
بێوار حەمدی:
سترانبێژ ( شێروان مەهدی) د دیدارەکێ دا بۆ بەرپەرێ هونەری یێ ڕۆژناما ئەڤرۆ دیارکر، هەر ژ زارۆکینیێ من حەزا سترانگۆتنێ هەبوویە و هەتا نوکە من شەش کلیپ هەنە و بەهرەیا سترانێ ژی ژ دەڤ خودایێ مەزنە، لەوما دڤێت هەستێن سترانبێژی دجیاوازبن ژ کەسێن نورمال.
ناڤهاتی د بەردەوامیا ئاخفتنا خوە دا گۆتژی، پتریا جاران ئەز ل ناڤ شەهیانان سترانان دبێژم و هندەک جاران ژی ل کافێ و ڕێستورانت و ئاهەنگێن خێزانی، لێ ئەگەر تا ڕاددەیەکی یێ بەرزەبم ژی ژ بەر مژوولیێن ژیانا ڕۆژانەیە، مە فولکلۆرەکێ گەلەکێ زەنگین هەیە و هەر هونەرمەندەک ژی فێقیەکە و تامەکا جودا هەیە، بەلێ ئەز گەلەک داخبارم ب دەنگێ خودێ ژێ ڕازی هونەرمەند «محەمەد شێخۆ»ی و « تەحسین تەها»ی.
شێروانی ئەو چەندە ژی دا زانین، هەر سترانەکا ئەم چێکەین ئەم پێدڤی ب نێزیکی هزار دۆلاراینە، چونکۆ ل ڤێرێ مە چو کۆمپانی نینن کو دەستێ هونەرمەندی بگرن، ئەگەر ئەڤ کۆمپانیە دگەل سترانبێژان د هاریکاربان بەرۆڤاژی دا هونەر پتر پێشکەڤیت و دا شێن کارێن جوانتر ئەنجام دەین
هێشتا گۆت: ب مخابنی ڤە ئەگەر ئەو پارەیێ ب هونەرمەندێن بیانی دهێتەدان ب سترانبێژێن مە بهێتەدان دێ پتر مفا ژ شیانێن وان هێتە دیتن، لەوما نابیت پشتا خوە بدەینە بەرهەمێن خوە یێن خۆمالی، بۆ داهاتی ژی مە بەرهەمێن جودا جودا بەرهەڤکرینە و ل دەمەکێ نێزیک ئێک ژوان دێ ب دووماهی هێت و کەڤیتە دخزمەتا حەز ژێکەرێن دەنگێ مە دا.
