ل دەڤەرا ئاكرێ چەندین رۆژە ئاگرەكێ سروشتی ل بن ئەردی دەركەفتیە
ئاكرێ، رەمەزان زەكەریا:
ل سنوورێ ناوچەداریا بجیل یا سەر ب دەڤەرداریا ئاكرێ ڤە، دەمێ پتری دو هەفتیایە ئاگرەكێ سروشتی ل سەرێ چیایێ سادا ل بن ئەردی دەركەفتیە و هەتا نوكە یێ هەلە و نەهاتیە ڤەمراندن.
عەقید ئیبراهیم فەریق، رێڤەبەرێ بەرگریا شارستانی ل دەڤەرداریا ئاكرێ بۆ ئەڤرۆ گۆت: «دەمێ پتری دو هەفتیایە ئاگرەكێ سروشتی ل سەرێ چیایێ سادا ل سنوورێ ناوچەداریا بجیل دەركەفتیە و بەردەوام یێ هەلە، لێ پشتی باران باری، ئاگر كێم ببوو، پاشی دوبارە هەلبووڤە».
ناڤبری گۆتژی: «ئاگر یێ ل جهەكێ دوور ل سەرێ چیای، چ كاریگەری ل سەر مرۆڤان نینە، بەلێ ئەم هزر دكەین، ئەگەر ڤەمرینین ئەو غازا ل پشت ڤەمراندنێ كاریگەریێ دروست بكەت، لەورا ژی مە نەڤەمراندیە».
عەقید ئیبراهیم فەریق زێدەتر گۆت: «ب فەرمی دێ داخوازێ ژ دەڤەردارێ ئاكرێ كەین، لیژنەیەكێ پێكبینیت، ئەڤە سێیەم جارە ئەڤ جۆرە روودانێن سروشتی ل دەڤەرێ دروست دبن و دووەم جارە ل سەرێ چیایێ سادا و جارەكێ ل گویسكێ روودایە، لێ ئەڤ ئاگرە یێ مەترسیدار نینە».
