ل زاخۆ بهایێ كەرەستەیێن خوارنێ و ساخلەمیێ هاتە كێمكرن
زاخۆ، عەلی حاجی:
ب بڕیارەكا گوهدار شێخۆ، سەرپەرشتێ ئیدارەیا سەربخوە یا زاخۆ د مەها رەمەزانێ دا بڕیار هاتە دان بهایێ كەرەستەیێن خوارنێ و ساخلەمیێ ل سنوورێ ئیدارەیا سەربخوە یا زاخۆ بهێنە كێمكرن.
ل دۆر ڤێ چەندێ كوڤان سیتۆ، رێڤەبەرێ چاڤدێریا بازرگانی ل زاخۆ گۆت: «ب بڕیارا گوهدار شێخۆ، سەرپەرشتێ ئیدارەیا سەربخوە یا زاخۆ، مە ڕێككەفتن ل گەل ٢٠ ماركێتێن زاخۆ كریە بۆ سالا دویێ ل دووڤ ئێك بهایێن كەرەستەیێن خوارنێ بهێتە كێمكرن، هەر د ئێكەم رۆژا مەها رەمەزانا پیرۆز دا ئەو بڕیارە كەڤتە د بیاڤێ بجهئینانێ دا و هەر ماركێتەكا پشكدار بوویی د وی پڕۆژەیی دا لافیتەك بەر دەرگەهێ ماركێتێ دانایە و لژنەیەكا تایبەت ژی هاتیە پێكئینان، داكو دوووڤچوونا وان ماركێتان بكەت و هەر كەسەك پێگیر ژی نەبیت دێ لافیتە هێتە لادان و ئەو جهە ژی دێ هێتە سزادان، زێدەباری ڤێ چەندێ هەر جهەكێ بازرگانی د مەها رەمەزانا پیرۆز دا پاوانكاریێ بكەت و كەرەستەیێن خوە گرانتر بكەت دێ ب توندی هێتە سزادان».
ل دۆر ئەرزانكرنا كەرەستەیێن ساخلەمیێ و پلێتێن نۆشداران دكتۆر سیروان ئەحمەد، رێڤەبەرێ گشتیێ ساخلەمیا زاخۆ دیار كر، د مەها رەمەزانا پیرۆز دا دێ پلێتێن هەمی نۆشداران ل سنوورێ ئیدارەیا سەربخوە یا زاخۆ دێ بنە ١٠ هزار دینار، هەمی تاقیگەهێن نۆشداری ب رێژەیا 25% دێ داشكاندنێ ئێخنە سەر گوژمێ گشتی و نۆشدارێن ددانان ژی 20% دێ داشكاندنێ د گوژمێ گشتی دا كەن و نەشتەرگەریێن بچووك و مەزن ل نەخۆشخانەیێن تایبەت 15% دێ داشكاندنێ د گوژمێ گشتی دا كەن.
