ل زاخۆ.. د چار سالان دا 50 قوتابخانە هاتینە نووژەنكرن
زاخۆ، دلۆڤان هالۆ:
پشتی زاخۆ بوویە ئیدارا سەربەخوە، خزمەتەكا بەرچاڤ د كەرتێ پەروەردێ دا هاتیەكرن، ب تایبەت ب ئاڤاكرن و نووژەنكرنا قوتابخانەیان، چەندین قوتابخانەیێن دوو دەوامی بووینە ئێك دەوامی و گۆت: بۆ سالا نوو یا خواندنێ پتری 101 هزار قوتابیان ل 343 قوتابخانەیان دەست ب خواندنێ كرییە.
سەلام پیرۆ، ڕێڤەبەرێ گشتی یێ پەروەردا زاخۆ بۆ ڕۆژناما ئەڤرۆ دیار كر، د چار سالێن دەربازبوویی دا 50 قوتابخانە ل سنوورێ ئیدارا سەربخوە یا زاخۆ هاتینە نووژەنكرن، بۆ ئەڤ سالە ژی شەش قوتابخانە هاتینە ڤەكرن و سێ ژ وان هاتبوونە نووژەنكرن، سێ ژ وان ژ نوو هاتبوونە ئاڤاكرن، بۆ سالا نوو یا خواندنێ پتری 101 هزار قوتابیان ل 343 قوتابخانەیان دەست ب خواندنێ كرییە.
ناڤهاتی ئاماژە ب وێ چەندێ ژی كر، سێ قوتابخانە ژی دوو دەوامی بوون، مە كرینە ئێك دەوامی، ئەڤێ چەندێ ژی بارسڤكیەك دروست كرییە كو ڕێژا قوتابیان د پۆلێ دا كێم ببیت، و بارسڤكی بۆ ئیدارێن قوتابخانەیان ژی پەیدابوویە كو بشێن ب شێوەیەكێ باشتر ڕۆلێ خوە ببینن و باشتر خزمەتا كەرتێ پەروەردێ و پڕۆسا خواندنێ بكەن».
زێدەتر ژی گۆت:»ب ئاڤاكرنا قوتابخانێن نوو ب ئێكجاری سێ دەوامی ل قوتابخانێن زاخۆ نەمایە و هندەك قوتابخانە ژی بووینە ئێك دەوامی و كار ل سەر ئاڤا كرنا هندەك قوتابخانێن دی ژی دهێتە كرن دا كو قوتابخانە ببنە ئێك دەوامی».
