ل زاخۆ زێدەتری 20% ئاڤا ڤەخوارنێ ب هەدەر دچیت
زاخۆ، دلۆڤان هالۆ:
ژ ئەگەرێ نە گرێدانا تەوافەیان ب تانكێن ئاڤێ ڤە ژ لایێ وەلاتیێن ئیدارا سەربخوە یا زاخۆ ڤە، ب ڕێژا زێدەتری 20% ئاڤا ڤەخوارنێ ب هەدەر دچیت، ئەڤ چەندە بوویە ئەگەر كو هندەك تاخ پڕی ئاڤ ببن و پشكەكا دی یا تاخان ژی ژ بێ ئاڤی بنالن.
ماهر جەعفەر، وەلاتیەكێ زاخۆیە بۆ ڕۆژناما ئەڤرۆ دیار كر، ئاڤا تاخێ مە ڕۆژەكێ دهێت و ڕۆژەكێ ناهێت، لێ پێدڤییە خەلكێ مە هەست ب بەرپرسایەتیێ بكەن و تەوافان بێخنە تانكێن خوە، دا كو ئاڤ ب هەدر نەچیت، ئەو مالێن تەوافە نە ئێخستینە تانكێن خوە هەتا سپێدێ ئاڤا تانكێن وان ب سەردا دچیت و جیرانێن وان د میننە بێ ئاڤ.
سەردار ناجی، وەلاتیەكێ دی یێ زاخۆیە دبێژیت:»هندەك مال یێن هەین ئەگەر ئاڤا خابیرێ زاخۆ هەمیێ بۆ وان بهێت تێرا وان ناكەت، چونكو تانكێن وان یێن ئاڤێ بێ تەوافەنە، هندەك مال ژی یێن هەین ب دەمژمێران حەنەفیێن وان د ڤەكرینە و ئاگەهـ ژێ نینە».
ئەندازیار سالح حەسەن، بەرپرسێ ڕێڤەبەریا ئاڤا زاخۆ گۆت:»د چوار سالێن بووری دا 4 هزار و 600 هێلێن زێدەگاڤی یێن ئاڤێ هاتینە لادان، ڕێ ب چ كەسێ ناهێتە دان ب شێوەیەكێ قاچاغ هێلێن ئاڤێ ژ بۆ خوە بكێشن، د بازاری دا بهایێ تەوافێ 5 هزار دینارن و نە گرێدانا وێ ب تانكێن ئاڤێ ڤە ژ لایێ بەشەكێ وەلاتیان ڤە بوویە ئەگەرێ ب هەدەردانا ئاڤا ڤەخوارنێ ب ڕێژا 20% هەتا 25%، مە هندەك ڕێنمایێن هەین كو ئەڤێن تەوافە نە گرێداین، ئەم دوو جاران ئاگەهدارییا وان دكەین و جارا سییێ ئەم ب گۆژمێ 50 هزاران سزا ددەین».
