ل زاخۆ 22 ڕۆژنامەڤان پشكداری خولەكا ڕۆژنامەڤانی یا نێڤدەولەتی بوون
زاخۆ، دلۆڤان هالۆ:
محەمەد سەدیق، بەرپرسێ نڤیسینگەها زاخۆ یا سەندیكا ڕۆژنامەنڤیسێن كوردستانێ بۆ ڕۆژناما ئەڤرۆ دیاركر كو ب ئامادەبوونا ئازاد حەمەد ئەمین، نەقیبێ سەندیكا ڕۆژنامەنڤیسێن كوردستانێ، خولەكا ڕۆژنامەڤانی یا سلامەتیا پیشەیی ژ لایێ نڤیسینگەها زاخۆ یا سەندیكا ڕۆژنامەنڤیسێن كوردستانێ ب هەڤكاری ل گەل فیدراسیۆنا نێڤدەولەتی یا ڕۆژنامەڤانان هاتە ڤەكرن.
ناڤهاتی ئاماژە ب وێ چەندێ ژی كر كو 22 ڕۆژنامەڤانێن زاخۆ پشكداری د ڤێ خولێ دا كر و ل دووڤ بەرنامەیەكێ رێكخستی و رێكوپێك ڕۆژانە وانەیێن تایبەت ل دۆر بابەتێ خوەپاراستنا ڕۆژنامەڤانان و سلامەتیا گیانێ وان د دەمێ شەر و كاودانێن تایبەت دا د هاتنە پێشكێشكرن و خول بۆ دەمێ دو ڕۆژان یا بەردەوام بوو.
محەمەد سەدیق گۆت: «ل دووماهیا خولێ باوەرنامەیێن نێڤدەولەتی یێن باوەرپێكری ل سەر پشكداربوویێن خولێ هاتنە بەلاڤكرن، پاشی د كۆنگرەیەكێ ڕۆژنامەڤانی دا نەقیبێ سەندیكا ڕۆژنامەنڤیسێن كوردستانێ بەحسێ گرنگیا خولێ و پاراستن و بەرەڤانیكرن ژ مافێن ڕۆژنامەڤانان كر».
