ل زوممار عەرەبان دەست ب سەر ئەرد و خانیێن كوردان دا گرتینە
لەزگین جوقی
ل ناحیا زوممار عەرەبێن هاوردە دەست ب سەر عەرد و خانیێن كوردا دگرن، پارێزگارێ نەینەوا لژنەك ل سەر ڤی بابەتی پێكئینایە، لێ هەتا نوكە ئاریشە نەهاتیە چارەسەر كرن. رێڤەبەرێ ناحیێ ژی دبێژیت: عەرەبێن هاوردە دبێژن ئەرد یێ مەیە و كورد ژی دبێژن یێ مەیە و خەلكێ كورد تاپۆ پێ هەیە و عەرەب دبێژن حكومەتا عێراقێ ئەم ئیناینە دەڤەرێ، لەوما هەتا نوكە ئەو ئاریشە نەهاتیە چارەسەر كرن.
ئەحمەد جەعفەر ڕێڤەبەرێ ناحیا زوممار بۆ رۆژنامەیا ئەڤرۆ دیار كر، پتریا مالێن كوردان پشتی ڕوودانێن 16ێ ئوكتۆبەرا سالا 2017ێ دەڤەر چۆلكرییە و نەڤەگەریاینە، عەرەبان دڤێت دەستێ خوە بدانن سەر خانیێن خەلكی ل زوممار، و گەلەك دونەمێن عەردی ژی ل زوممار هەنە كۆ ئاریشە ل سەر چێبوویە، عەرەبێن هاوردە دبێژن عەرد یێ مەیە و كورد ژی دبێژن یێ مەیە و خەلكێ كورد تاپۆ پێ هەیە و عەرەب دبێژن حكومەتا عێراقێ ئەم ئیناینە دەڤەرێ، لەوما هەتا نوكە ئەو ئاریشە نەهاتیە چارەسەر كرن.
حەسەن خەلو، بەرپرسێ لیژنا پارتی ل زوممار دیاركر، د سالا 1986ێ ل وێ دەمی گوندێن عەرەبان بن ئاڤ بوونە و حكومەتا عێراقا روخیایی د ساڵا1986ێ عەرەب ل سەر مولكێ كوردان ل بەردیە ناحیا زوممار و ئاكنجیی كرینە هەتا ساڵ 2003ێ دەمێ حكومەتا عێراقێ هاتیە روخاندن ل وێ دەمێ عەرەب چوون و خەلكێ كورد زڤرینە سەر مال و مولكێ خۆ ل زوممار هەتا رۆژا 16ێ ئوكتوبەرێ سالا 2017ێ جارەكا دی عەرەب هاتن و دناڤ مەعسكەرێن سوپایێ عێراقێ دا ئاكنجیبوون».
خۆیا كر كو بەرێ چەندەكێ جارەكا دی حكومەتا عێراقێ ئەو عەرەب ئاگەهداركرینە كو پێتڤیە معەسكەرێن حكومەتێ چوول بكەن و عەرەب ژی یێ دبێژن ئەم دێ ل بەردیە ئاكنجیی بن ئەو بخۆ بەردیە مولكێ كوردایە و خەلكێ كورد قەبوول ناكەت عەرەب سەر مولكێ وان ئاكنجیی بن، نوكە ئەڤ ئاریشە بۆ خەلكێ كورد ل زومار چێ بوویە ئەڤە چەندێن جارە عەرەبێن هاوردە هەول ددەن لسەر مولكێ كوردان ل زوممار ئاكنجیی بن».
