ل سالا بۆری جودابوون پتر بوو ژ مەهركرنێ
دهۆك، نەوزاد هلۆری:
دادگەها تێهەلچونا دهۆكێ، ئامارێن كەیسێن گشتی یێن سالا بوری ل سنورێ پارێزگەها دهۆكێ و زاخۆ بەلاڤكرن، ل گورەی ئامارێن وان ئاماران مارەبڕین كێم بویە و جودابوون زێدە بویە، ل سالا بوری ل دهۆكێ و زاخۆ 13 هزار و 307 مارەبڕین و دو هزار و 102 جودابوون هاتینە توماركرن
ل گورەی ئامارێن دادگەها تێهەلچونا پارێزگەها دهۆكێ، سالا بوری ل دهۆكێ و زاخۆ 12 هزار و 967 مارەبڕین هاتینە تومار كرن كو پرانیا وان ژی دكەڤنە دهۆك و زاخۆ و ئاكرێ، كێمترین ژی دكەڤنە قەزا باتیفا كو تنێ 65 مارەبڕین بوون.
دیسان هەر ل سالا بوری هزار و 992 هەڤژین ل هەڤدو جودا بوینە كو پرانیا وان ژی دكەڤنە دهۆك و زاخۆ و سێمێلێ، كێمترین ژی دكەڤنە باتیفا چوار جودا بوون بون، ژبلی ڤێ یەكێ 29 حالەتێن هەڤژینیا دوویێ و 815 حالەتێن پەسەندكرنا هەڤژینیا دویێ ل دەرڤەی دادگەهێ هاتینە تومار كرن.
ژلایەكێ دیە هەر ل گورەی ئامارێن دادگەها ناڤبری، 340 حالەتێن مارەبڕینێ دناڤ ئاینێن ل دهۆكێ و زاخۆ هاتینە تومار كرن، ل گەل 110 حالەتێن ژێكجودابوونا هەڤژینان، ل گورەی ئامارێن سالا 2021ێ، ل پارێزگەها دهۆكێ 13 هزار و 441 حالەتێن مارەبڕینێ و 887 حالەتێن ئینانا هەڤژینا دویێ، دیسان هزار و 796 حالەتێن جودابوونێ هاتینە توماركرن.
شارەزایێن بوارێ قانوونی ئاماژە دكەن كو بەرچاڤترین ئەگەرێن جودابوونا هەڤژینان دزڤریت بۆ رەوشا دارایی و نە وەكهەڤیا ئاستێ رەوشەنبیری و خیانەتا هەڤژینی و ئاریشێن جڤاكی و چەندین ئەگەرێن دی.
هەر ل گورەی ئامارێن دادگەها تێهەلچونا دهۆكێ، سالا بوری ل دهۆكێ و زاخۆ، هزار و 304 كەیس ل دادگەها تێهەلچونا ناوچا دهۆكێ هاتینە تومار كرن، هزار و 230 كەیس ل دادگەها تاوانان هاتینە تومار كرن، 665 كەیس ژی ل دادگەها ناوجەوانان هاتینە توماركرن، دیسان ل دادگەها كەتنێ ژی نەه هزار و 182 كەیس هاتینە توماركرن، ل داگەها ڤەكولینێ ژی 22 هزار و 477 كەیس هاتینە توماركرن، دیسان ل دادگەها بارێ شارستانی سێ هزار و 476 كەیس و ل دادگەها بارێ كەسایەتی پێنج هزار و 344 كەیس و ل دادگەها كار ژی 70 كەیس هاتینە توماركرن،
ل هەر ئێك ژ دادگەهێن بەرایی هەشت هزار و 122 كەیس و دادگەها كاروبارێن 281 كەیس و ل دادگەها بەرهنگاربوونا توندوتیژیا خێزانی یێن كەتن 296 كەیس و ل دادگەها بەرهنگاربوونا توندوتیژیا خێزانی یێن ڤەكولینێ سێ هزار و 863 كەیس هاتینە توماركرن.
