ل ساڵا 1986 ڕژێما بەعس مالا مە ژ دهۆكێ دەرئێخست
سالار محەمەد دۆسكی:
4 – 6
ب ڕاستی مە نەدزانی دێ كیڤە چین، سەید سالحی ژی چ تشتێ ئاشكرا بۆ مە نەگۆت. بتنێ وی گۆتە مە: ئەو ئەركێ هوین پێ هاتینە ڕاسپاردن ل سەر فەرمانا جەنابێ سەرۆك بارزانی و سەركردایەتییا پارتی یە. پاشی مە زانی كارەكێ گرنگە.
من سەید زین ئەلعابدین دەرگەلكی ل گەلیێ بازێ دیت، من سەد دینارێن عێراقی ژێ وەرگرتن و گۆتە وی: پاشی وان پارا بۆ خۆ ژ ماڵا مە وەرگرە.
كانی ڕەش: كانیەكا بناڤ و دەنگە دكەڤیتە باكوورێ ڕۆژهەلاتێ چیایێ مەتینا و باشوورێ گوندێ هێسێ ل دەڤەرا كانیماسێ.
محەمەد تاهر تەوفیق عەبدی: یێ بەرنیاس ب محەمەد تاهر ئاسهی، ل ساڵا 1957 ل گوندێ ئاسهێ ل دەڤەرا كانیماسێ ژ دایك بوویە. ل ساڵا 1980 دبیتە پێشمەرگە، هەر وێ ساڵێ دچیتە خولا كادرا یا مەڵبەندی ل بارەگایێ مەكتەبا سیاسی ل ڕاژان ل ڕۆژهەلاتێ كوردستانێ، ئەو ل خولێ ب پلا زۆر باش دەرچوو بوو. ساڵا 1981 ئەو دبیتە كادرێ ڕێكخراوا شەهید عەلی عوبەیدوللایی. پاشی دهێتە ڤەگوهاستن بۆ بارەگایێ لژنا ئامێدیێ- بەشی ڕێكخستن. ل ساڵا 1988 ئاوارەی باكوورێ كوردستانێ و پاشی ڕۆژهەلاتێ كوردستانێ دبیت. پشتی سەرهلدانێ ل بەشێ ڕێكخستنا لقێ ئێك كار دكەت، پاشی دهێتە ڤەگوهاستن بۆ كۆمەڵگەها ئیبراهیم خلیل و دبیتە جێگرێ بەرپرسێ كۆمەڵگەهێ. ل 8/2/2018 ژئەگەرێ نەخۆشیەكا گران وەغەرا دووماهیێ كرییە.
تەوفیق یەحیا محەمەد: یێ بەرنیاس ب تەوفیق ئورمەداودی، ل ساڵا 1962 ل گوندێ ئورمەداودا ل دەڤەرا كانیماسێ ژ دایك بوویە. ل ساڵا 1978 پەیوەندییێ ب ڕێزێن پارتی دكەت. ل ساڵا 1981 پەیوەندییێ ب شۆڕەشا گولانێ دكەت و ل سنوورێ لژنا ناوچا ئامێدیێ دگەل ڕێكخراوا شەهید عەلی عوبەیدوللایی دبیتە پێشمەرگە. ل 10/3/1984 د هێرشەكێدا بۆ سەر رەبیا گوندێ تنێ ل دەڤەرا بامەڕنێ شەهید دبیت.
دكتور كەمال(1) دا نەخۆشەكی دەرمان كەت دەستەكێ وی شكەست و یێ دی ژ گەهـ چوو.
پسمامێ من سەبری عومەر(2) دگەل سەید نایفی ل ڕێكخراوا شەهید شەعبان عومەر پێشمەرگە بوو، ل ئادارا ساڵا 1983 سبری گەلەك نەخۆش بوو، ئەو بۆ دەمێ چەند ڕۆژەكا تۆشی زك ئێشانەكا مەزن بوو. ئەز و پسمامێ من یاسین چووینە بارەگایێ لژنا
ئامێدییێ دا نوژدارەك بهێت چارەسەریا وی بكەت. ئەم گەهشتینە گوندێ كانی مەزنێ، مە پرسیارا بەرپرسێ لژنێ كر، هندەك هەڤالا گۆت: عورفان هرۆری جێگرێ بەرپرسێ لژنێ نوكە ل مزگەفتا گوندێ بازێ یە.
ئەم چووینە دەف عورفانی، مە ڕەوشا نەخۆشییا سەبری بۆ وی ڤەگێڕا. پاشی وی كاغەزەكا سپی ژ چانتا خۆ ئینادەر و نامەیەك بۆ دكتور كەمالی نڤێسی و تیپەك تێ پێچا و گۆت: نوكە كەمال ل گوندێ كانی مەزنێ یە، ڤێ نامێ بدەنە ڤێ دێ دگەل هەوە هێت نەخۆشێ هەوە چارەسەر كەت.
هەروەسا عورفانی گۆت: محەمەدێ دەوارا – هرۆری یێ (خەربەند) نوكە یێ ل ناڤبەرا گوندێ بازێ و هەترشێ، دێ چن هێسترەكا باش ژێ وەرگرن، داكو دكتور لێ سیار ببیت.
سەردەمێ شۆڕەشا گۆلانێ خەربەندێن دەوارا ژی هەبوون. ئەو دەمێ بارەگایێ لقێ ل كۆماتەی محەمەدێ دەوارا هرۆری خەربەند بوو. گاڕانەكا دەوارا ل بەردەستێ وی بوو و كارێ قەگۆهاستنێ بۆ شۆڕەشێ دكر. بتایبەتی پەیدا كرنا ئەرزاقی و ڤەگوهاستنا چەك و تەقەمەنیا ب دەوارا. ئەو دەمێ بارەگایێ لقێ چوویە گوندێ زێوە شكان درباز قەدشی خەربەند بوو. هەژمارەكا پێشمەرگا و دەوارا لبەر دەستێ وی ژی بوون.
ئەز و پسمامێ من یاسین چووینە دەف محەمەدێ دەوارا. هێسترەكا بلند بۆ مە بەرهەڤ كر و ڕادەستی مە كر. مە قەستا گوندێ كانی مەزنێ كر. مە دكتور كەمال ل ماڵا مەڵا فەریقێ كانی مەزنی دیت، مە ناما عورفانی ڕادەستی وی كر، نامە ڤەكر و خواند و پاشی گۆت: كەرەم كەن دا بچین، مە دا ڕێ و ئەم گەهشتینە ناڤبەرا گوندێ كانی مەزنێ و تویشەمبیكێ، مە چانتا دكتۆری ل سەر پشتا هێسترێ ئاسێكر و مە گۆتێ: كەرەم كە سیاربە. هێستر گەلەك یا بلند بوو ئەو نەشیا سیاربیت.
مە هێستر گەهاندە نێزیك بەرەكی و دكتور سیار بوو. بەلێ مە نەزانی ئەو چاوا سیار بوو، ئێكسەر هێسترێ خۆ هەڵاڤێت و پێن خۆ بلند كرنە ئەسمانی. دكتوری ژی باش كورتانێ هێسترێ گرت، بەلێ پا فایدە نەكر!!! مە هند دیت هێسترێ دكتور دەڤ و دەڤ ل ناڤ كناریەكێدا و كەفتە سەر دەستێن خۆ، ڕەوشا وی گەلەك تێكچوو و جلكێن وی هەمی بوونە هەڕی و تەقن. ئەم گەلەك ژ بەر دكتوری خەمگین بووین و مە گۆتە وی بزڤڕەڤە: بەلێ ئەو ڕازی نەبوو و گۆتە مە: دا بچین.
ئەو دەمێ دكتور ژ سەر پشتا هێسترێ كەفتی، دەستەكێ وی شكەست و یێ دی ژی ژ گەهـ چوو. مە چانتا دكتوری سەر پشتا هێسترێ ئاسێكر و ئێدی ئەو ب پیا چوو و ل هێسترێ سیار نەبوو. هێدی هێدی چووین و بۆ نیڤرۆ ئەم گەهشتینە دەف سەبری ل گوندێ ئێكمالێ مالا خاڵ ئیبراهیمێ سەعیدێ نوحێ.
دەمێ دكتوری باش تەماشەی ڕەوشا نەخۆشی كری، ئەز و پسمامێ من یاسین جودا گازی كرین و گۆتە مە: ئەگەر هوین ڤی نەخۆشی بزویترین دەم نەگەهیننە جهەكی كو نشتەرگەری بۆ بهێتە كرن ئەو دێ گیانێ خۆ ژ دەست دەت.
مە گۆتە وی: ئەم نزانین دێ كیڤە بەین، چ جه نینن.
دكتوری گۆت: عێراق، ئیران، تركیا هەر جهێ هوین بشێن بگەهیننێ دروستە ئەز ژێ بەرپرسیارم، دێ ئاگەهداریا لژنێ ژی كەم كو ب فەرمانا من چوویە.
پشتی من و پسمامێ من یاسینی دانوستاندن و گەنگەشە كرین، مە چ ڕێك نەدیتن ژبلێ عێراقێ، بەلێ بۆ وی كاری ژی پێدڤییە مرۆڤێن زیرەك و جوامێر پەیدا كەین و ب پلانەكا ڕێك و پێك بیت، چنكو كارەكێ ب مەترسی یە.
پاشی سێ كەسێن جوامێر و مێرخاس خۆ بەرهەڤكرن كو وی كاری ئەنجام ب دەن. ئەو ژی خال ئیبراهیم سەعید نوح ئێكمالەیی، دگەل برازایێ وی نوری محەمەد سەعید، پسمامێ وی ئەمین مستەفا بوون.
وان هەر سێ خۆشمێرا ناسناما ئیحسان ئەمین ئێكمالەیی پەیدا كر كو ناڤێ وی هێشتا بۆ لەشكریێ نەهاتبوو و وێنێ ناسناما وی ژی نێزیكی وێنێ سەبری بوو. ب شەڤ و ب نهێنی وان هێسترەك بەرهەڤ كر و سەبری ل هێسترێ سیار كر، ناسناما ئیحسان ژی كرە د بەریكا ویدا و گەهاندە ئوردیگایێ قەدش. پاشی بۆ باژێڕێ میسل.
پشتی نشتەرگەری بۆ سەبری هاتییە كرن، دووبارە زڤڕی ڤە گوندێ ئێكمالێ. ل دهۆك و میسل كەس و كارێن مە ژی هاریكارییەكا باش بۆ سەبری كر هەتا چارەسەرییا وی هاتییە كرن و زڤڕاندییەڤە.
هەر وێ ڕۆژێ مە دكتور كەمال ژی گەهاندە گوندێ مێركاجیا دەف هۆستایێ دەست و پێیا خۆشابە مێركاجی و هەر دوو دەستێن وی ڤەگرتن. ڕۆژا پاشتر من و پسمامێ من یاسینی دكتور زڤڕاندەڤە گوندێ بازێ.
هەلبەت هەر كەسەكێ بەحسێ بابەتێن ساخلەمییێ و دكتورێن سەردەمێ شۆڕەشا گولانێ بكەت، پێدڤییە دكتور كەمال نەهێتە ژبیر كرن و بەحسێ وی بهێتە كرن.
دكتور كەمال بناڤ و دەنگترین كادرێ ساخلەمیێ بوو ل سەر دەمێ شۆڕەشا گولانێ ل سنوورێ لقێ ئێك و هەمی دەڤەرێ.
دكتور كەسەكێ گەلەك ڕوح سڤك و جوامێر بوو، ب شەڤ و ڕۆژ د خزمەتا پێشمەرگەی و وەلاتیاندا بوو. ل ئاوارەیێ، تایبەت ل ئوردیگایێ مێردینێ ژی وی گەلەك خزمەتا خەلكێ كەمپێ كرییە.
