ل سوریایێ ب هووری دووڤچوونا رەڤاندییان دهێتە كرن
دهوك، لەزگین جوقی
نڤیسینگەها رزگاركرنا رەڤاندیێن ئێزدی دیار كر، بزاڤ هاتینە كرن بچینە د ناڤ كەمپا هۆلێ دا و ئەڤە بابەتەكێ مرۆڤی یە و دوورە ژ هەر بابەتەكێ دیتر و حوكمەتا ئیراقێ هاریكار نینە، ئەم داخوازێ دكەین هەڤكار بن بۆ رزگاركرنا رەڤاندیێن ئێزدی ل سووریێ”.
حسێن قائیدی، بەرپرسێ نڤیسینگەها رزگاركرنا رەڤاندیێن ئێزدی راگەهاند: پشتی شەڕ و ئالۆزیێن ل سووریێ چێبووین، ب هووری دووڤچوونا رەڤاندیێن ئێزدی دكەین، ب تایبەت ل كەمپا هۆلێ پێشبینی دكەین پتری 300 رەڤاندیان هەبن، جهێ داخێ یە دەستهەلاتا كەمپێ یا هاریكار نینە رەڤاندیان رزگار بكەین.
گۆت ژی: تیرۆرستێن داعش ل سالا 2014ێ ل شنگالێ شەش هەزار و 417 ئێزدی رەڤاندن، هەتا نوكە سێ هەزار و 584 رەڤاندی ژ دەستێ داعشێ هاتینە رزگاركرن و دوو هەزار و 591 كەس ماینە.
حسۆ هورمی، سەرۆكێ سازییا ئێزدیان یا نێڤدەولەتی بۆ بەرهنگاربوونا جینۆسایدێ دیار كر، حوكمەتا ئیراقێ نەڤێت دادگەهەكا تایبەت بۆ كەیسا جینۆسایدێ ڤەكەت، ژ بەر كۆ دێ گەلەك بەلگەنامە ئاشكرابن و گەلەك كەس دێ هێنە دادگەهیكرن، لەورا بەغدا ل سەر ڤێ كەیسێ یا رژد نینە.
حسۆ هورمی، سەرۆكێ سازییا ئێزدیان یا نێڤدەوڵەتی بۆ بەرەنگاربوونا جینۆسایدێ راگەهاند، حوكمەتا هەرێما كوردستانێ گەلەك یا هەڤكارە بۆ جینۆسایدا ئێزدیان، بۆ ئێكەم جار شاندەكێ دادوەران ژ پاریس قەستا هەرێمێ كرن بۆ دیتنا دیدەڤان و بەلگەنامەیێن جینۆسایدا ئێزدیان ل شنگالێ، لێ مخابن حوكمەتا ئیراقێ وەكو پێدڤی هەڤكار نینە كۆ د بنیات دا ئیراق نابینیت كەیسا ئێزدیان جینۆسایدە و ل دووڤ مادا چوار ژ یاسا تیرورێ سەردەریێ دگەل تاوانبارێن جینۆسایدا شنگالێ دكەن، ئەڤە باش نینە ئیراق دكەت.
