ل سووریێ خوەسەریا کوردان گەرەنتی بوویە
بسپۆرەکێ کاروبارێن سیاسی دیار دکەت، ل سووریێ رێڤەبەریا خوەسەر یا کوردان هەیە و هێزەکا مەزن یا سەربازی ژی هەیە، دڤێت تورکیا و شام ژی راستیێن هەی قەبوول بکەن، چونکی ئەمریکا و جڤاکێ نێڤدەولەتی راستیا کوردان ل سووریێ قەبوول کرینە.
د. حوسنی ماهاللی بسپۆرێ کاروبارێن سیاسی ل تورکیا راگه‌هاند کو ده‌ستهه‌لاتا تورکیا و ده‌ستهه‌لاتا نها یا شامێ قه‌بول بکه‌ن یان نه‌کەن نه گرنگه، ژ به‌ر کو ئه‌مریکا و هه‌ڤپه‌یمانیا نێڤده‌وله‌تی ل سه‌ر پاشه‌رۆژا سووریێ بریار داینه و گۆت: (ل رۆژئاڤا ئانکو باکورێ سووریێ هێزه‌کا مه‌زن یا کوردان هەیە کو هژمارا وێ هێزێ ژ سەد هزار کەسان زێدەترە، هەروەسا کوردان ل باکورێ سووریێ رێڤەبەریا خوه ئانکو خوه‌سه‌ریا خوه راگه‌هاندینه، چەندین سالن ژی خوە برێڤە دبەن و شیان دربێن مەزن ل داعشێ بدەن، هەروەسا ل دەڤەرێن کو کورد برێڤە دبەن ژی ئارامی هەیە و هەموو پێکهاتە ژی د ناڤ ئاشتیێ دا دژین، ئەمریکا و وەلاتێن رۆژئاڤایی ژی پشتەڤانیێ ل دەستهەلاتا کوردی دکەن، ژ بەر ڤێ یەکێ گرنگە تورکیا ژی سیاسەتا خوە ل هەمبەر کوردان ل سووریێ بگوهۆڕیت).
ناڤهاتی ئەو یەک ژی دیار کر، دڤێت تورکیا دەست ژ فشارێن خوە یێن ل سەر شامێ بەردەت، تورکیا ناهێلیت کورد و شام پرسێن هەی د ناڤبەرا خوە دا چارەسەر بکەن، لێ ئەو یەک دێ ئەنجامێن خوە یێن گەلەک خراب هەبن، چونکی کورد ب چو رەنگەکێ قەبوول ناکەن وەکو بەری سالا ٢٠١١ سەرەدەری ل گەل وان بهێتە کرن، ئانکو کورد ئەوا ب خوونێ بدەستڤە ئیناینە وەسا ب ساناهی رادەستی کەسێ ناکەن، رۆژانە بەرپرسێن تورکیا دبێژن دڤێت هەسەدە چەکێن خوە رادەست بکەت، هەر کەس دزانیت هەسەدە کارەک وەسا ناکەت و کورد ژی ئێدی قەبوول ناکەن ل سووریێ بێ ماف بژین، ژ بەر ڤێ یەکێ ژی گرنگە تورکیا ل گۆر راستیا نها ل سووریێ سیاسەتێ بکەت.
بسپۆرێ کاروبارێن سیاسی د دووماهیا ئاخڤتنا خوە دا بەحسێ قووناغا ئاشتیێ یا ل تورکیا ژی کر و دیار کر، هەر پێشهاتەیەک ل تورکیا و سووریێ سەبارەت ب کوردان روو بدەت دێ کاریگەریا خوە ل سەر هەر دو ئالیان کەت، ئانکو هەکە قووناغا ئاشتیێ سەرکەڤیت دێ کاریگەریا خوە ل سەر پرسا کوردی ل سووریی ژی هەبیت و هەروەسا هەکە رێککەفتنەکا باش د ناڤبەرا شامێ و کوردان دا بهێتە کرن دێ کاریگەریا خوە یا باش ل سەر رەوشا کوردان ل تورکیا ژی هەبیت، ژ بەر ڤێ یەکێ ژی گرنگە تورکیا هزرا هەر تشتەکێ بکەت، ئانکو ئالۆزبوونا رەوشا سووریێ و ئەگەرێ ئێرشەکا سەربازی ل سەر رۆژئاڤایێ کوردستانێ دشێت ببیتە ئەگەرێ ژناڤچوونا قووناغا ئاشتیێ یا ل تورکیا.
