ل سەر ئاستێ كوردستانا مەزن دایە رێكخراوا كوردستان فۆتۆ ل رۆژا جیهانی یا فۆتۆیێ دێ ب پێشانگەهەکێ پشکداریێ د هەلمەتا رێكخراوا فۆتۆ یا جیهانیدا کەت
ئەڤرۆ نیۆز،زنار تۆڤی:
شێرزاد رەسول فەقێ”سەرۆكێ رێكخراوا كوردستان فۆتۆ بۆ ئەڤرۆ نیۆز دیارکر:کو رێكخراوا كوردستان فۆتۆ ئەڤ سالەژی وەكی سالێن بوری دێ پشکداریێ د رۆژا جیهانی یا فۆتۆ یێ دا كەن،ب چاڤدێریا(د. پشتیوان سادق)وەزیرێ پەروەردا حوکمەتا هەرێما کوردستانێ،ل سەر ئاستێ كوردستانا مەزن دا دێ پێشانگەهەکا ڤەکری یا فۆتۆگرافیێ ب پشکداریا (27) فۆتۆگرافەران ل 19.8.2017 د ڤێ رۆژا جیهانیدا ڤەکەن.
هەروەسا گۆت ژی:پشکداریا مە زێدەتر یا تایبەتە ب دروشمێ(ژ لێنزێ كامیرا ”كریس كۆچێرا” یێ نڤیسەر و فۆتۆگرافەر بەرەف ئاسۆیێ پرشنگدارێ سەربەخۆیێ) دێ پشکداریێ كەین،ئەڤە ژی وەك ئەمەكداریەكێ یە بەرامبەری ڤی كەسایەتیێ ناڤدار و ئەو دۆستێ دیرینێ كورد،کو جهێ گرنگی و بایەخێ بوویە بۆ كوردان،د واری نڤێسین و رۆژنامەڤانی و فۆتۆیێ دا.
شێرزادی هێشتا دیارکریە:مە دڤێت ب رێیا فۆتۆیێ پشتەڤان و هاریكار بین بۆ رێیا سەربەخۆیێ،کو ئەڤ پرۆسەیە نوکە ل بەر سنگێ مەیە،کو ئەڤە خەونا هەموو کوردانە ل هەر قولاچەکا جیهانێ،د پشکداریا مە یا ئەڤ سالەدا مە دڤێت پێنگاڤێن سەرکەفتنێ بهاڤێژین و ئارمانجێن خوە ب دەستڤە بینین،دیسا مە ل بەرە چەندین پێشانگەهێن تایبەت ب كەلتورێ نەتەوەیی یێ مە ل دەرڤەی وەلاتی ژی ڤەکەین،کو هەر وەك سالا چوویی ب رێیا نوونەراتیا كوردستان فۆتۆ ل بریتانیا هاتیە ڤەکرن،لێ هەر سالەکێ مە دڤێت جوداتر کار بکەین،ئەڤە ژی بتنێ بۆ خزمەتکرنا گەلێ مە یە و بۆ بەرژەوەندیا گشتی یە،لەورا هەول و ماندی بوون دێ د كار و چالاكیێن مە دا د بەردەوام بن،بێی کو ئەم گوهێ خوە بدەینە ڤی بارودۆخێ نالەبارێ ل كوردستانێ هەی ژ روویێ ئابووری و دەروونی ڤە،لەوما ئەندامێن كوردستان فۆتۆ وەك سەربازێن بەرزە و ماندوونەناس كارێ خوە دكەن و مە هیڤیا رەزامەندیێ بۆ هەموو لایەنان هەیە.
زێدەتر دبێژیت:ئەڤ پشکداریکرنا سەرتاسەری یا هەموو پارچێن كوردستانێ وە دکەت،کو هەموو فۆتۆگرافەرێن كوردستانێ پێکڤە بهێنە گرێدان و هەڤرکیێ بکەن ل سەر کارێن باش و باشتر،هەروەسا ئەڤ پشکداریکرنە دێ نیاسینیێ دناڤبەرا كەلتور و سروشتێ دەڤەرێن كوردستانێ دا دروست کەت،هەروەسا دێ پەیوەندیێن بهێز دناڤبەرا وان دا هەبن و دێ بیر و بۆچوون و سەرنج و تێبینیان دناڤبەرا خوە دا ئالوگۆر کەن،دیسا دێ بەرهەمێن مە ژی دەولەمەندتر بن و سەرەرای هندێ دێ گۆهداریا رەخنەیێن هەر كەسەكێ شارەزا و پسپۆر کەین،یێن کو دڤی واری دا د شارە زا،بەلێ ئەو رەخنە رەخنێن ئاڤاکەر بن.
