ل سەر رووبەرێ 580 دۆنەمێن ئەردی سێ پارك ل زاخۆ دێ هێنە دروستكرن
دهۆك، لەزگین جوقی:
رێڤەبەرێ گشتی یێ وەبەرهێنانێ ل ئیدارا سەربخوە یا زاخۆ دیار كر، ل سەر رووبەرێ 580 دۆنەمێن ئەردی سێ پارك ل ئیدارا سەربخوە یا زاخۆ دێ هێتە دروستكرن و دێ بیتە ئەگەر رێژا كەسكاتیێ ل زاخۆ گەلەك زێدە ببیت.
جگەرخوین تاهر، رێڤەبەرێ گشتی یێ وەبەرهێنانێ ل ئیدارا سەربخوە یا زاخۆ بۆ رۆژناما ئەڤرۆ ئاشكرا كر، ل سەر رووبەرێ 580 دۆنەمێن ئەردی سێ پارك ل ئیدارا سەربخوە یا زاخۆ دێ هێنە چێكرن، ژ وانا ژی: پاركا سیپان ل سەر رووبەرێ 90 دۆنەمێن ئەردی دێ هێتە چێكرن، ئەڤ پاركە پێكهاتیە ژ هەژمارەكا ئاڤاهیێن گەشتیاری ل گەل كافێتریا وخوارنگەه و یاریگەهێن وەرزشی و چەندین خزمەتێن دی ژی د ناڤ دا دێ هێنە چێكرن، داكو سەرنجا گەشتیاران بۆ خوە راكێشیت.
جگەرخوین ئاماژە ب وێ چەندێ ژی كر كو پاركەك ژی ل سەر رووبەرێ نێزیكی 170 دۆنەمێن ئەردی دێ هێتە چێكرن و پاركەك ژی ل سەر رووبەرێ 320 دۆنەمێن ئەردی دێ هێتە چێكرن، سەرجەمێ گشتی یێ رووبەرێ ڤان سێ پاركان ل زاخۆ دبیتە 580 دۆنەمێن ئەردی، ئەڤە دێ بیتە ئەگەر رێژا كەسكاتیێ ل زاخۆ گەلەك زێدە ببیت»
رێڤەبەرێ گشتی یێ وەبەرهێنانێ ل ئیدارا سەربخوە یا زاخۆ گۆت: «دیزاین و نەخشە بۆ چێكرنا وان پاركان گەهشتیە رێڤەبەریا گشتی یا وەبەرهێنانێ ل ئیدارا سەربخوە یا زاخۆ و سالا بهێت دەست بجهئینانا ڤان پڕۆژەیان دێ هێتە كرن بۆ پتر خزمەتكرنا وەلاتیان و سەرنجڕاكێشانا گەشتیاران بۆ دەڤەرا زاخۆ».
