ل سەر فەرمانا مەسرور بارزانی فەرمانبەرێن گرێبەست دێ پارچەیێن ئەردی وەرگرن
هەولێر، قائید میرۆ:
ل گورەی بڕیارا مەسرور بارزانی، فەرمانبەرێن گرێبەست ژی دێ پارچەیێن ئەردی وەرگرن، ل گورەی زانیاریێن رۆژناما ئەڤرۆ ب هەمان رێنمایی و مەرجێن فەرمانبەرێن هەمیشەیی دێ فەرمانبەرێن گرێبەست پارچەیێن ئەردی وەرگرن.
ل گورەی زانیاریێن رۆژناما ئەڤرۆ مەسرور بارزانی، سەرۆكێ حوكمەتا هەرێما كوردستانێ بڕیار دایە فەرمانبەرێن گرێبەست ژی پارچەیێن ئەردی وەربگرن، كو هژمارا وان 30 هزار فەرمانبەرن، بەلاڤكرنا پارچەیێن ئەردی ل سەر فەرمانبەرێن گرێبەست، ب هەمان مەرج و رێنمایێن فەرمانبەرێن هەمیشەییە، هەر فەرمانبەرەكێ هەشت سالان خزمەت هەبیت دێ ژ وەرگرتنا پارچەیێن ئەردی مفاداربیت، بەلێ پرۆسەیا بەلاڤكرنا ئەردی ل سەر فەرمانبەرێن گرێبەست دێ پشتی تەمام بوونا پرۆسەیا فەرمانبەرێن هەمیشەیی دەستپێكەت.
سەربەست مەولود، رێڤەبەرێ قانوونی ل وەزارەتا باژێڕڤانیێ بۆ رۆژناما ئەڤرۆ دیاركر، حوكمەتا هەرێما كوردستانێ بڕیار دایە، فەرمانبەرێن گرێبەست ژی مینا فەرمانبەرێن هەمیشەیی ژ وەرگرتنا پارچەیێن ئەردی مفاداربن، بەلێ هێشتا نڤیسارا فەرمی بۆ دەستپێكرنا پرۆسەیا بەلاڤكرنا ئەردی ل سەر فەرمانبەرێن گرێبەست نەگەهشتیە وەزارەتا باژێڕڤانی و گەشتوگوزارێ.
