ل سەر 100 دۆنەمێن ئەردی ل دهۆكێ دار دێ هێنە چاندن
پارێزگارێ دهۆكێ ل گەل رێڤەبەریێن پەیوەندیدار بڕیار دا سەد دۆنەمێن ئەردی ل ئالۆكا و نزاركێ و گژەبەران ب دو قووناغان بهێنە چاندن.
پشتی ئەزموونا سەركەفتی یا پڕۆژەیێن دارستانێن زانكۆیا دهۆكێ و كۆمبوونا شۆباتا ئەڤ سالە ٢٠٢٣ ل دۆر چاندنا داران ل سەنتەرێ باژێرێ دهۆكێ، ب تایبەت هەردو چیایێن هنداڤا باژێری، د. عەلی تەتەر، پارێزگارێ دهۆكێ ل گەل رێڤەبەریێن پەیوەندیدار ب ئامادەبوونا رێكخراوا كرێكارێن نیڤدەولەتی ILO ب مەرەما كەسكرنا سەنتەرێ باژێرێ دهۆكێ و دەوروبەرن كۆمبوو.
پارێزگارێ دهۆكێ گۆت: «پیتەپێدانا ژینگەهێ و چاندنا داروباران ئێك ژ ئەولەویەتێن كارێ مەیە، ئەم ل گەل دام و دەزگەهێن پەیوەندیدار كار بۆ چاندنا داروباران ل هەژمارەكا ئەردان دكەین، ب تایبەتی هەردو چیایێن ل هنداڤ باژێرێ دهۆكێ بهێنە كەسكرن، دیسا سۆپاسیا رێكخراوا ILO یا نێڤدەولەتی دكەین، بەرهەڤیا خوە بۆ ئەنجامدانا ڤی پڕۆژەی دیاركری».
پارێزگارێ دهۆكێ د كۆمبوونێ دا ب بەرهەڤبوونا رێڤەبەریێن پەیوەندیدار بڕیاردا ١٠٠ دۆنەمێن ئەردی ب ڤی رەنگی و ب زووترین دەم بچنە د قووناغا بجهئینانێ دا (١١ دۆنەم ل ئالۆكا، ٣٣ دۆنەم ل نزاركێ و ٤٤ دۆنەم ژی ل تاخێ گژەبەران).
دیسا ل رۆژا 3/8/2023 و ل ژێر درووشمێ (ئەم ئاشقێن رۆژێینە، تاریا جینۆسایدا مە نا بزدینە) ل هولا كۆنفرانسان و ب بەرهەڤبوونا د. عەلی تەتەر، پارێزگارێ دهۆكێ و چەندین بەرپرسێن حزبی و ئیداری و لەشكری و جڤاكی مەراسیمێن ساخكرنا نەهەمین جینۆسایدا ئێزدیان هاتنە گێڕان.
