ل شاریا چه‌ند كه‌سان گوهێن قوتابیه‌كی بڕین
ئه‌ڤرۆ، نه‌وزاد هلۆری:
ژ ئه‌گه‌ره‌كێ نه‌دیار و ژ لایێ چه‌ند كه‌سێن نه‌ناسیار ڤه، ل رۆژێن بۆری، گوهێن قوتابیه‌كێ پۆلا 12 ئاماده‌یی ل كۆمه‌لگه‌ها شاریا دهێنه بڕین، پارێزگارێ دهۆكێ ژی ئالیێن شۆله‌ژێ راسپاردن، كو بكه‌رێن روودانێ بهێنه گرتن.
ژێده‌ره‌كی ل كۆمه‌لگه‌ها شاریا بۆ رۆژناما ئه‌ڤرۆ گۆت: (ل رۆژێن بۆری ژ ئه‌گه‌ره‌كێ نه‌دیار و ژ لایێ چه‌ند كه‌سێن نه‌ناسیار ڤه، گوهێن قوتابیه‌كێ پۆلا 12 ئاماده‌یی بناڤێ “وه‌جدی” كو د ژیێ نێزیكێ 18 سالیێ دایه ل كۆمه‌لگه‌ها شاریا ل دهۆكێ دهێنه بڕین).
زێده‌تر گوت: (روودان ل ده‌ردۆرێن ده‌مژمێر 11ێ شه‌ڤ روودایه، ده‌مێ ئه‌و قوتابی ل پێش یاریه‌كا ته‌پا پێی ل كافیتریایه‌كێ ڤه‌دگه‌ڕیا مال و د رێكێ دا چه‌ند كه‌س دهێنه به‌راهیا وی و پاشی گۆهێن وی دبڕن، د نوكه دا ئه‌و قوتابی ل نه‌خۆشخانێ یه و چاره‌سه‌ریا وی دهێته كرن و ره‌وشا وی هه‌تا راده‌یه‌كی یا باشه و پێدڤی ب هێشتا چاره‌سه‌ریێ یه).
هێمن سلێمان، به‌رپرسێ راگه‌هاندنا رێڤه‌به‌ریا پۆلیسێن پارێزگه‌ها دهۆكێ د كۆنگره‌یه‌كێ رۆژنامه‌ڤانی دا گۆت: (ب بڕیارا دادوه‌رێ ڤه‌كۆلینێ دووڤچوون و لێگه‌ڕیان بۆ تاوانبارێن روودانێ ده‌ستپێكریه، هه‌تا نوكه چو كه‌س نه‌هاتینه گرتن و بكه‌رێن روودانێ نه‌دیارن).
ل دووڤ پێزانینێن ئه‌ڤرۆ پارێزگارێ دهۆكێ ئالیێن شوله‌ژێ راسپاردینه، كو ب زووترین ده‌م تاوانبارێن روودانێ بهێنه گرتن و دووڤچوونه‌كا هوور ل سه‌ر روودانێ بهێته كرن.
