ل شنگال ئەڤ سالە رێژەكا كێم یا ئەردی كەڤتیە د پلانا چاندنێ دا
لەزگین جوقی
رێڤەبەرێ چاندنێ ل ناحیا سنوونێ دیار كر، د مێژوویا قەزا شنگالێ دا ب تایبەتی ژی ل ناحیا سنوونێ، ئەڤ سالە رێژەكا گەلەك كێم یا ئەردی كەڤتیە د پلانا چاندنێ دا و هاریكاریا وان جۆتیاران ناهێتە كرن یێن نەكەڤنە د پلانێ دا».
بەرەكات عیسا، رێڤەبەرێ چاندنێ ل ناحیا سنوونێ ل قەزا شنگالێ بۆ رۆژناما ئەڤرۆ راگەهاند، سالانە ل ناحیا سنوونێ هەتا 300 هزار دونەمێن ئەردی ب دەرامەتێ گەنم و جەهی هاتنە چاندن و هەموو كەفتە د پلانێ دا و هاریكاریا جۆتیاران هاتە كرن، ئەڤ سالە ب تنێ دێ 75 هزار دونەمێن ئەردی كەفتینە د پلانا چاندنێ دا.
گۆت ژی: بریار هاتیە دان ئەو ئەردێ كریا سالانە نە دەتە حوكمەتێ، نەكەڤتە د پلانا چاندنێ دا، ژ بەر نەدانا كریا سالانە یا ئەردێ چاندنێ بۆ حوكمەتا ئیراقێ، ئەڤ سالە رێژەكا كێم یا ئەردی كەڤتیە د پلانا چاندنێ دا و هاریكاریا وان جۆتیاران ناهێتە كرن یێن نەكەڤتینە د پلانا چاندنێ دا، هندەك جۆتیار هەنە ل سالا 2000ێ كریا ئەردێ خۆ نەداینە، ئەڤە هەموو دێ بیتە بارگرانی ل سەر جۆتیاران و نەشێن ژ هاریكاریێن حوكمەتێ بۆ چاندنا گەنم و جەهی ل ناحیا سنوونێ مفاداربن».
ئاشكرا كر، هەر جۆتیارەكێ گیانی خۆ ژ دەست دابیت، ئەو ژی ئەڤ سالە ژ پلانا چاندنێ هاتنە دەرئێخستن ل شنگالێ، گەلەك كەس هەنە ئەرد ل سەر ناڤێ باب و پاپیرێن وانە و هەموو دێ ژ هاریكاریێن چاندنێ بێ بەهربن، ئەڤ بریارە هاتینە دان و نە د بەرژەوەندیا جۆتیارێن قەزا شنگالێ دانە.
