ل شوونا موچەی چوار کچێن ئێزدی داینە داعشەکێ
ئەڤرۆ نیوز ، نەوزاد ھلۆری:
دادوەرێ ئێک ژ دادگەھێن باشوورێ موسل چێروکا دەستدرێژکرنا لسەر چوار کچێن ئێزدی ڤەدگێریت دەما کو بەرامبەر موچەی بو چەکدارەکێ داعش ھاتینەدان.
مالپەرا شەفەق نیوز بەلاڤکریە کو چەکدارەکێ داعش پشتی کو د شەرەکێ دا ل باشوورێ موسل کەفتیە دەست ھێزێن ئەمنی و ھاتیە گرتن و ب تومەتا دەستدرێژی کرنا لسەر چوار کچێن رەڤاندیێن ئێزدی و کوشتنا ١٠ کچێن دن ھاتیە تاوانبارکرن ھاتیە دادگەکرن وەکو د راپورتەکا رۆژناما دەیلی تەلەگراف یا بەریتانی دا ھاتیە بەلاڤکرن.
چەکدارێ داعش کو ناڤێ وی “محەمەد ئەحمەد”ە و ژیێ وی ٤٠ سالن دبێژیت: (من ئەو ھەر چوار کچێن ئێزدی بەرامبەر موچەیێ خوەیێ مەھا نە وەرگرتینە ، و زور د جوان بوون و ھەر شەڤەکێ ل گەل ئێک ژ وان بووم)
ئەو چەکدارێ داعش کو سمبێل و رھێن وی تێکەلی ھەڤ ببوون و بەرامبەر دادوەرێ دانپێدان ب تاوانێن خوە کر و دیارکریە کو ئەو نەیێ پەشمانە ژ وان تاوانێن کو وی کری ، بەلێ ل گەل ڤێ یەکێ ژی ترسەکا زور لدەف ھەبوو و ل دەما کو ئاخفت ژی ھەموو گیانێ وی د لەرزی.
دانپێدانا ئەڤی چەکدارێ داعش دانپێدانا ئێکی نینە دھێتەکرن ژلایێ چەکدارێن داعش ڤە ل بارا دەستدرێژی کرنا لسەر کچێن ئێزدی بەلکو ئێک ژ وان چەکدارێن کوپ ێش وی ھاتیەگرتن ددەتن دیارکرن و دانپێدانێ ب وێ یەکێ دکەت کو ئەوی دەستدرێژی کریە سەر ٢٠٠ کچێن ئێزدی.
دەما کو چەکدارێن داعش ھێرشکریە سەر قەزا سنگالێ ھزاران زەلام کوشتن و د گورێن ب کوم دا ڤەشارتینە وەکو نەتەوەیێن ئێکگرتی ڤێ یەکێ دوپات دکەن و ھژمارەکا زور یا کچ و ژنان گرتن و بو مەرەمێن جیھادا نیکاحی بکارئینان.
ھێزێن عیراقی ل مەھا بوری پشتی شەرەکێ بەردەوام بو دەما ١٠ مەھا شیان چەکدارێن داعش ل موسل دەر بکەن.