ل شۆرەشا گـولانێ 11 مامۆستا ل شێخان نەهێلان قوتابخانە بهێنە داخستن
دیدار، سالار محەمەد دۆسكی:
مامۆستایەكێ شۆرەشێ، ئاشكەراكر كو لددیف بریارا جەنابێ سەرۆك بارزانی وەك ڤەكری هەمبەر داخستنا قوتابخانانن مە درێژە ب قوتابخانێن شورەشێ دا و گەلەك ژ ئەوان قوتابیان ئەڤرۆ گەهشتینە پلێن بلند و ل جهێن جودا جودا خزمەتا مللەتی دكەن.
مامۆستا موسا گەڤەركی مامۆستایێ قوتابخانێن شۆرەشێ د دیدارەكێ دا ل گەل رۆژناما ئەڤرۆ گۆت: دەسپێكا سالا 1985ێ دەستەكا مامۆستا هەبوو ل گوندێ(گەڤەركێ) سەر ب قەزا شێخان ڤە و ئەوا مامۆستا خواندنگەها شورەشێ ڤەكر،ل سالا 1986ێ رژێما بەعس بریارەك دەركر كو ئەو خواندنگەهێن دكەڤنە سنورێ جهێن ئازادكری و شۆرەشێ هەمی بهێنە داخستن، وەك هەڤركی هەمبەر ڤێ بریارێ مە هەشت مامۆستایێن زەلام ل گەل مامۆستایەكا ئافرەت بریار دا قوتابخانا شورەشێ ڤەكەین و بگشتی ئەم بووینە (11) مامۆستا و شیاین دەرگەهێ پێنچ قوتابخانا ل دەڤەرا شێخان ڤەكەین ڤە و بەردەوامیێ بدەینە خواندنێ و زارۆكێن پێشمەرگەی فێری زانست و زانینێ بكەین و بەردەوام بین ل سەر خەباتا خوە یا فێربوونێ ل گەل زارۆكێن پێشمەرگەی.
هەمان مامۆستا گۆتژی: ئەو هەر پێنچ قوتابخانە ئەڤە بوون(گەڤەركێ، كانی مازێ، شكەفتێ، كانیكا، صوریێ) ل سالا 1985ێ وەك پێشتر مە ئاماژە پێكری قوتابخانە ل گوندێ (گەڤەركێ) ڤە بوو و ل گوندێن دی ل سالا 1986ێ هاتنە ڤەكرن و بەردەوام بوون هەتا ئەنفالێن رەش ل سالا 1988ێ وی دەمی مە گەلەك ماندیبوون دیت و سەخمەراتی كاودانێ، ئەمنیێن نەخوش و نەبوونا پێدڤیێن خواندنێ ل وی سەر دەمی و هاتن وچوون گەلەك یا بزحمەت بوو و هەتا گەلەك جاران مەترسی دكەتە سەر ژیانا مە و قوتابیان لێ هەمی رێك مە دەربازكرن كو بەردەوام بین ل سەر خەبات و بەرخودانا خوە مل ب ملێ پێشمەرگەی ڤە.
هەمان مامۆستایێ شۆرەشێ ئەو ژی گۆت: ئێك ژ مامۆستا بووم یێ خوبەش چوومە قوتابخانا گوندێ (كانی مازێ) وانە من دگۆتنە قوتابیان ب شێوەكێ خوە بەخش و دەسپێكێ دەمێ من سەرەدانا قوتابخانێ كری دەسپێكێ دیوارێ قوتابخانی هەرفت بوو و من دەست ب نووژەنكرنا دیوارێ قوتابخانێ كر و دووڤ دا نە خزمەتگوزار و نە زێرەڤان و نە كەسەەك هەبوو بانی بگێریتن بەلكو ل گەل درێژە پێدان ب ئەركێ خوەیێ گۆتنا وانا ل قوتابخانێ ئەف كارێن مە ئاماژە پێكرین هەر رو من دكرن.
ناڤبری ئاشكەراكر ژی ژ بەر تێكچوونا كاودانا ل هەوە ئەنفالان هەر هەمی تومارێن قوتابخانێ هاتنە سوتن و ژنافبرن و لەوما سەرژمێریەكا راست و دروست ل بەر دەست نینە، یا بتنێ دهێـە زانین نێزیكی پێنچ پولان ل قوتابخانێ هەبووینە
مامۆستا موسا مامۆستایێ شۆرەشێ، گۆتژی: نێزیكی 1000 مەترا ئاڤا ڤەخوارنێ یا ژ قوتابخانێ دوور بوو و گەلەك جاران فرۆكێن دوژمنی هنداف سەرێ مەبوون و من دل نەدا زارۆكان فرێكەەمە ئاڤێ و دیسا ژ بەر كاودانێن وی دەمی و مەترسیێ ل سەر ژیانا ئەوا زارۆكان و ئەز ب وێ دیراتی یا من ئاماژە پێكری بوو چوومە ئاڤێ و ب ڤی دارو دەستی مە ژیانا خوە دناڤا شورەشێ دا بەردەوامی دایێ.
هەمان مامۆستا بەحسێ ژیانا خوە یا كەسوكی دكەت ل گەل خەلكێ گوندی و گۆت: كاودانێن ژیانێ وی دەمی گەلەك بزحمەت وبوون و رێك هەمی دگرتی بوون و گەلەك یا بزحمەت بوو تشتەكێ خوارنێ مرۆڤ بخوە دابین بكەت و پتر ژیارا خەلكێ دەڤەرێن ئازادكری ل سەر تەرش و كەوالی بوو، وی دەمی ئەم بتنێ كارێ مامۆستایێ رابووین و هاتبووینە راسپاردن وەك مامۆستایێن شۆرەشێ و هەر هەمی كارێ مە ژی خوبەخش بوو و بتنێ مەرەم ئەو بوو زارۆكێن پێشمەرگەی نەزان نەمینن بەلكو بەردەوام بن ل سەر وێ خەبات و بەرخودانێ، لەوما مە داخازا هندەك ئەرزاقی كر ژ خەلكێ گوندی دا وەك مامۆستا بەردەوامیێ بدەینە كارێ خوە ل قوتابخانێ و هەمان دەم ژی بخوە خوارنێ ژی دروست بكەین، لێ خەلكێ گۆندی گۆت نەخێر بتنێ هوون وانا بدەنە زارۆكێن مە و خوارن و ڤەخوارنا هەوە دێ ل سەر خەلكێ گوندی بیت و بریاردان هەر رۆژ و هەرسێ دانا لدیف ئێك مامۆستا بۆ خوارنێ ل مالەكێ بن و هەر تشتێ خوارنێ یێ هەلگرتی و خوش و بەركەفتی خەلكێ گوندی ئەو بۆ دەستەیا مامۆستان بەرهەف دكر و راستی كریارەكا گەلەك بزحمەت بوو لێ بۆ خاترا زارۆكێن مللەتێ خوە مە بەردەوامی دا وێ خواندنێ دا دلێ پێشمەرگەی ژی نەمینتە دیف زارۆكێن وان را و هزر نەكەن خواندن ژ زارۆكێن وا چوو.
مامۆستا موسا ناڤێن چەندین مامۆستایێن ل گەل وانە دگۆتنە زارۆكان ل سەر دەمێ شۆرەشێ ئاشكەراكرن و گۆت: عادل حاجی موسی نوكە ل جیهازێ مەكتەبا سەرۆكی یە وی دەمی مامۆستا بوو ل گەل من، حسێن محەمەد ئەحمەد، عەبدوالرحمان حسێن، یوردق نامق، ئەحمەد حسێن، تاها سلێمان سەعید، عەدنان تاها، محەمەد ئیبراهیم، شەهید ئەحمەد ئەنفالا بەرزەبوو، شەهید حسێن، حسێن رەبەتكی، رەشید صوری) قوتابخانە نێزیكی 1000 مەترا ژ ماعسكەرێ بەعیسا یێ دوور بوو و مە درێژاهی دا كاروانێ زانین و زانستی ل قوتابخانا خوە.
هەمان مامۆستا گۆت: وی دەمی رژێما بەعس گەلەك نەخوشی بۆ خەلكێ گوندی دروستكرن و گەلەك جاران فرۆكان دهاڤێتە گوندی و خەلكێ گوندی گوند بەردان و نەچاربووین ب چینە زووما و ئێدی ژیان گەلەك بزحمەتر لێ هات و مەرەم ژ خواندنێ ئەو بوو وەك پیشتر مە ئاماژە پێكری وەك هەڤركیەك بوو ل گەل دوژمنی و دیسا مە هزر وێ چەندێ كر كو ئەڤە بزڤرنە خواندنێ دا بەردەوامیێ بدەنە پولێن خوە و دیسا مفا ژ وێ خواندنێ هاتە وەرگرتن و دەمێ چووینە بەحركێ تاقیكرنەك ب ئەوا زارۆكان هاتەكرن و هەر ئێك ل ئاستێ خوە و زێدەتر ژی هاتە وەرگرتن و درێژەدانا خواندنا خوە ب شێوەكێ فەرمی و نەهاتنە هەژمارتن دابراوو ژ قوتابخانێ و گەلەك ژ ئەوا قوتابیان ئەڤرۆ كە دبیاڤێن جودا جودا خزمەتا گەل و وەلاتێ خوە دكەن.
هێشتا گۆت: وی دەمی هەمی كارێ مە خوبەخشی بوو و بریارا جەنابێ سەرۆك مەسعود بارزانی بوو و وەك هەڤركیە بۆ دوژمنی كو ئەم ل كیرێ بین ئەم دێ درێژە ب خواندن و زانستی دەین و دووف دا سوپاسیەك سەرۆك مەسعود بارزانی ب دەنگێ خوە ب رێكا ئێزگێ دەنگێ كوردستانێ گەهاندە مە و زێدەتر پشتەڤانی و مورالا مە بلند بوو.
گۆتژی: ل وەرزێ هاڤینێ چونكە بهێنڤەدان بوو هندەك ئامیرێن پەیوەندیێ بوومە هاتبوون و هەر دەڤەرەكێ هندەك هاتبوونە راسپاردن و گەلەك جاران ل سەر لڤینێن دوژمنی مە ئێك و دو ئاگەهدار دكر ب ئەوان ئامیران و ئەڤە ژی كارەكێ دیر بوو ژ بلی كارێ گۆتنا وانان ل قوتابخانێن شۆرەشێ و گەلەك جاران پشكداری چالاكیێن لەشكەری و پارتیزانی دبووین و 16/6/1987 بریندار بووم پشتی من پشكداری چالاكیەكێ كری و هەتا نوكە پیەكێ من ژ پیەكی كورت ترە.
مامۆستا موسای ئاشكراكر ژی كو ئێكی ئادارا سالا 1986ێ بۆ جارا ئێكێ وی پەیوەندی ب شورەشا 26ی گولانێ كریە وەك پێشمەرگە و سەر ب رێكخراوا (بارزان) سەر ب ناوچا شێخان ڤە، ئەو بوو جەنابێ سەرۆكی بریار دا قوتابخانێن شۆرەشێ بهێنەڤەكرن ئەم هاتینە راسپاردن وەك مامۆستایێن شۆرەشێ و مە قوتابخانێن خوە ڤەكرن.
ناڤبری گۆت: ل سەرهلدانا سالا 1991ێ پشتی هاتنا مە ژ بەحركێ پشكداری سەرهلدانێ بووین و دووف دا لژنا شێخان هاتەدانان و هەتا نوكە بەردەوام وەك ئەندامێ لقێ شێخانێ پارتی دیموكراتی كوردستان.
ل دووماهیێ ناڤبری گۆت: كاودانێن نوكە گەلەك باشترن ژ ئەوان كاودانێن وی سەردەمی و داخازێ ژ حوكمەتا خوە دكەین رۆلێ پێشمەرگەی و ئەوا كەسانێ، ماندیبوون دیتی ژبیر نەكەن و زێدەتر چاڤدانا ئەڤان تەخا بهێتەگرتن و زێدەتر ئەو رۆژێن سەخت و دژوار بۆ گەنجێن نوكە بهێنە گۆتن و شرۆڤەكرن دا بزانان ئەڤرۆ ب ساناهی دروست نەبوویە.
