ل شۆڕەشا ئیلۆنێ كار گەلەك ب نهێنی دهاتنەكرن و حوكمەتا ئیراقێ پێزانین ل سەر بزاڤێن پێشمەرگەی نەبوون
دیدار، سالار محەمەد دۆسكی:
ئەحمەد بداغ زێدەتر گۆت:حوكمەتا عیراقێ دەست ب شەری كر، رەفتارا رژێما بەعس و كریارێن ئەڤە چار سالە ئەو چەندە خویاكر كو بەعسیا چ باوەری ب چارەسەركرنا ئاریشا مللەتێ كورد نەبوو و رێكەفتنا ئادارا 1970ێ تەكتیكەكا سیاسی و لەشكەری و ئەمنی بوو و مەرەم ژێ دا ئەڤان ئارمانجا ب دەست ڤە بینت، حوكمەتا عیراقێ گەلەك لاواز ب بوو و شیان نەمابوون خوە ل بەر دربێن كوژەكێن لەشكەرێ كوردستانێ رابگریت، مەرەم پێ ئەو بوو بهێنا خوە ڤەدەن و كاودانێن نافخویێن حزبا بەعس و حوكمەتا خوە رێكبێخن و صەدام حسێنی دڤیا هەمی چوكێن دەست هەلاتێ بێخیتە د دەستێن خوە دا، بەعیسا ئەو باوەری هەبوو كو هەبوونا شورەشا ئیلونێ یا گرێدایە ب مەلا مسەفایێ بارزانی ڤە لەوما تیروركرنا بارزانیێ رەحمەتی ئارمانجا وان بوو و هەر ئەڤە بۆ ئەگەر ل 29/9/1971ێ هندەك كەسێن هەوالگێریا خوە ل گەل هندەك مەلایێن شیعا یێن بێ گونەه هنارتنە بارەگایێ بارزانی ب مەرەما تیرۆركرنا بارزانی و دو كەسان خوە ب بارزانی ڤە تەقاند لێ چ ل بارزانی نەهات و بتنێ پیچەك بریندار بوو، پشتی ڤێ پلانێ و ژ هەمی ئالیان ڤە خوە بهێز ئێخستین و ئەڤە بۆ ئەگەر جارەكا دی ئاگرێ شەری ل گەل شورەشا مللەتێ كورد و خەلكێ كوردستانێ هەلكرەڤە.
پێشمەرگێ هەر دو شورەشێن ئیلون و گولانێ ئەو ژی گۆت: توپخانا هێزا دهۆك رۆلەكێ مەزن د هەمی شەران دا هەبوو ل سالا 1974 و 1975ێ ب تایبەتی پەلا توپا (82مل) و پەلا توپا(120ملم) ل هەمی بەروكێن شەری مە توپچیا هەفكاریەكا ئێكجار زور ل گەل بەتلویون و سریان دا هەبوو ل برۆكێن شەری و ئەم هەمی وەك تیمەمێ بووین و مە پێكڤە كار دكر بۆ وێ ئارمانجێ كو پتر زەربا ب داوشینە دوژمنێن مللەتێ كورد و نەهێلین ل سەر دەڤەرێن ئازادكری دا بهێنە پێش، رۆژنەمەڤانێن بیانی هاتنە نك مە توپچیێن هێزا دهۆك و ل پێش چاڤێن وان مە سەنگەرێن لەشكەرێ عیراقێ توپ باران دكرن، ئەو رۆژنامەڤان ب زیرەكی و شارەزیا پێشمەرگەی دمانە حێبەتی كو هندە دنێزیك و هندە زال ب سەر لەشكەرێ عیراقێ دا هەر جهێ ئەڤان رۆژنامەڤانا ڤیابا مە ب دژواری توپ لێدان، چەندین بەلگە فلم نوكە ل سەر بزاڤ و چالاكیێن لەشكەری یێن هەڤالێن مە توپخانا هێزا دهۆك هەنە و تەلەڤزیونێن كورد ب هەلكەفتا دا نیشا بینەران د دەن، ل هاڤینا سالا 1974ێ رۆژنامەڤانەكێ ئەمریكی هات سەرەدانا مە كر ل گوندێ پیرۆمەرا ل (كلوخێ مێشێ) و بەرخودا جهێ مە و توپا خوە لێدانای یێ رووت بوو و چ دارو بەر ل رەخا نەبوون و توپا مە یا دیار بوو و ئەو رۆژنامەڤان گەلەك حێبەتی ما و گۆت هوون شێن لیوا دهۆك بدەن من گۆتێ بەلێ گۆت لێدەن دا وێنەكەم و مە ژی ئەو جهێ وی رۆژنامەڤانی ڤیای مە لێدا و گەلەك حێبەتی بوو، گەلەك وێنێن پێشمەرگەی و تایبەت توپچیان گرتن، دەمێ شكەستنا سالا 1975ێ و چووینە ئیرانێ گەلەك هەڤالان ل ئەمریكا تێلەفونا من كر و گۆتن گوڤارەكا ئەمریكی دەركەفتیە و گەلەك وێنێن تە تێدا هەنە، دیسا ل سالا 1974ێ رۆژنامەڤانەكێ فەرەنسی ل (شكەفتا سمتی) ل گوندێ پیرۆمەرا سەرەدانا مە كر و پشتی ب چاڤێن خوە دیتی ئەم یێ ب هووری و ب رێكخستی جهێن رژێما بەعس ل دهۆكێ توپباران دكەین و بەعسیا چو ژێ ناهێت بكەن وی رۆژنامەڤانی ژی گوت گەلەك ب شێوازێ هەوە یێ لەشكری داخبارم و گۆتە من باوەری من هەیە تو نە (كوردی) تو (ئسرائیلی) لەوما تویێ شەهرەزایی د توپخانێ دا و ئەف شارەزیایە ل نك كوردان نینە و هەر جهێ تە ڤێت تویێ لێدەی و بێگۆمان تو ئەفسەرەكێ (ئسرائیلی) و ئەڤ دانوستاندا من و وی رۆژنامەڤانی ب بەرهەڤبوونا (عەلی خەلیل خوشەبی و عەبدولرزاق گەرماڤی) هاتەكرن، عەبدولرزاق گۆت ئەحمەد خوە ب پارێزە و هێزێن ئیراقێ ژی یێ دگەهشتینە وێ باوەریێ كو ئەڤ جورە هاڤێتنە نەیا پێشمەرگەی یە و هزر دكەن ئەفسەرێن ئسرائیلێ ل گەل پێشمەرگەی نە دڤی جەبهەی دا و مە ب توپان هەمی بزاڤ و لڤینێن حوكمەتا بەعس دناڤا دهۆك دا تێكدان، مە توپچیێن هێزا دهۆك، لیوا (18) یا لەشكرێ ئیراقێ ل دهۆكێ دورپێچ كربوو و هەمی بزاڤ و چالاكی هاتبوونە ژ كارئێخستن و پشتی چەندین مە ژنافبرین نەچاربووین یێن مای ببنە ئالوكان، باراپترا ترۆمبێلێن خوە ڤەشارتن و برنە ئاڤاهیەكێ سڤیل ل رۆژئاڤایێ بارەگایێ لیوا (18) یا دهۆك بناڤێ(وحدە میكانیكیە) پێزانین ل سەر ڤێ چەندێ بوومە هاتن و ئەو جهێ ترۆمبێلێن خوە برینێ توپا مە یا (82ملم) نەگەهشتێ، مە پلان دانا كو ب توپا خوە یا (120ملم) ل ئەڤان ترۆمبێلان بدەین، ل ئێڤاری یا نەوروزا سالا 1974ێ هەمی پێشمەرگە دسەنگەران دا بوون و چاڤەرێ بوونكا ئەم توپچی دێ چو چالاكی كەین، ئەزچووم توپا (120ملم) ل دنافبەر كەلا پیرۆمەرا و كوپێ رەنیێ دانا و من توپ ئاراستەی (وحدە میكانیكیە) كر و من هەڤالەكێ توپچیێ زیرەك بناڤێ( عەمەر محەمەد ئەمین باجلوری) ل سەر دوربینا توپێ دانا و هژمارەكا توپچیان ژی من دانانە ل گەل و دناڤبەرا (قەوغایێ و كەلها پیرۆمەرا) بوومە رەسەدێ توپێ و من فەرمان ل توپچیان كر گولەكێ ب هاڤێژن و گولا ئێكێ مە ل نیڤا ئارمانجێ دا و ئاگرەكێ مەزن بەر بوو جەبلەخانە و ترۆمبێلێن لەشكرێ ئیراقێ و دەمێ ئاگر بەربوویێ پێشمەرگەی ل هەمی جەبهان ل تلیلییا دا و كرە هەوار و گۆتن دەستێن هەوە دخوش گەلی توپچیان و من گازیكر دوبارە كەن یا دووێ هاڤێت ئەو ئاگرێ ب ترۆمبێلێن لیوایێ ڤە گولا دووێ ڤەمراند و پێشمەرگە گەلەك عاجزبوون، گولا سیێ دووبارە ئاگر بەربوویێ و ئەو ترۆمبێلێن رەڤاندین هەمی هاتنە سوتن و مە دربەكێ مەزن ل لەشكەرێ عیراقێ دا و ئاگرێ جەژنا نەوروزێ مە ل سەر دلێ دوژمنی هەلكر، دڤی دەمی دا كاروانەكێ ترۆمبێلێن لەشكەری ژ ئالوكا ل هەوار لیوا دهۆك هاتن و بوومە زانیاری هاتن و مە ب توپا (82ملم) نە هێلا بگەهن و ل نێزیك (شیف جەردانێ) مە چەندین ترۆمبێلێن وێ هێزێ پەلخاندن، و گەلەك سەربازێ، خودان پلە تێدا هاتنە سوتن و نەچاربوون ترۆمبێلێن مای لێكزڤراندن و ب سەرشوری چوونە جهێ ژێ هاتین، ئەم وەك توپچی دبێ بەهربووین ژ بهێنڤەدانان.