ل شێخان پانزین ب 450 دیناران دهێته به‌لاڤكرن
شێخان، بارزان مزووری:
قایمقامێ قه‌زا شێخان بۆ رۆژناما ئه‌ڤرۆ دیار كر، پێنج وێستگه‌هێن به‌لاڤكرنا پانزینا حكومی كو سه‌ر ب ئیدارا پارێزگه‌ها نه‌ینه‌وا ڤه‌نه ل قه‌زا شێخان هه‌نه و پانزین ل وان وێستگه‌هان ب 450 دیناران ل سه‌ر وه‌لاتیان دهێته به‌لاڤكرن.
سه‌ردار یه‌حیا عه‌بدولعه‌زیز، قایمقامێ قه‌زا شێخان گۆت: “ئه‌ڤه ده‌مێ دو رۆژانه وه‌كو شایسته‌یێن ده‌ڤه‌را شێخان 14 هزار لترێن پانزینێ بۆ وان پێنج وێستگه‌هێن به‌لاڤكرنا پانزینا حكومی ل سنوورێ قه‌زا شێخان هاتینه و ب شێوازه‌كێ جوان و رێكوپێك ژلایێ كارمه‌ندێن وێستگه‌هان و پۆلیسان ڤه دهێته به‌لاڤكرن”.
ناڤهاتی خویا كر، ئه‌و رێژا پانزینێ ل دووڤ رێنمایێن وه‌زاره‌تا نه‌فتا ئیراقێ دهێته به‌لاڤكرن و هه‌ر لتره‌ك ب 450 دیناران بۆ شۆفێران دهێته‌دان.
قایمقامێ قه‌زا شێخان زێده‌تر گۆت: “مه ب نڤیساره‌كا فه‌رمی ب رێكا ئیدارا پارێزگه‌ها نه‌ینه‌وا ل دووڤ شایسته‌یێن ده‌ڤه‌رێ و سه‌رژمێریا قه‌زایێ، داخواز ژ وه‌زاره‌تا نه‌فتا ئیراقێ كریه كو به‌هرا شێخان زێده‌تر لێ بكه‌ت، ژ به‌ركو هه‌موو جهێن پارێزگه‌هێ سه‌ره‌دانا قه‌زا شێخان دكه‌ن بۆ وه‌رگرتنا پانزینێ”.
