ل شەڕێ كانی ماسێ نەخۆشترین رۆژا من بوو دەمێ هەڤالێ من محەمەد صالح بۆتی شەهید بووی
دیدار، سالار محەمەد دۆسكی:
پێشمەرگێ شۆڕەشا گولانێ، جەعفەر حسێن میرزا بێسری، ل سالا 1962 ل گوندێ بێسرێ ژ دایك بوویە، ل سالا 1982ێ پەیوەندی ب رێزێن پێشمەرگێ كوردستانێ كریە، و ئەنفالێن رەش پشكداربوویە و سەرهلدانێ پشكدار بوویە، و هەتا ناڤەراستا سالێن نوتان بەردەوام بوویە.
پێشمەرگە، جەعفەر بێسری، بۆ رۆژناما ئەڤرۆ گۆت: ل سالا 1982ێ رێكخراوا زهێر بامەرنی ل گوندێ (خازیاڤا) بوو، دووڤ دا هاتینە هنارتن بۆ بارەگایێ لقێ ئێك ل (كوماتە) دووڤدا هاتمە وەرگرتن وەك پێشمەرگە و هاتمە رەوانەكرن بۆ رێكخراوا (فەرج ئەلنكی) وی دەمی شەهید( محەمەد صالح بۆتی) لژنێ بوو و خواست ل گەل بم وی دەمی یێ بێ چەك بوومن پشتی من داخازا دەستیردانێ كر و هاتمە مال بابێ من (3500) دینارێن سویسری دانە من وی دەمی بڤی پارەی دا خانیەكی بخوە پێ كری، چووم من (كلاشینكوفەك و چاردە خورەك و دێربینەك) من كرین.
هێشتا گۆت: ل سالا 1983 ب شەڤ مە هێرشی رەبیەكێ كر ل گوندێ بادێ مە (12) كلاشینكوف و (2) قەناس و چەندەك كوشتن و پێنچ هاتنە ئێخسیركرن و گرێ (گەرماف) ل سالا 1985 ل ئەترویش مە هاڤێتە ترۆمبێلەك و كەمینەك ل بەربهار مەدایە، مە هاڤێتی یە بنگەهێ پولیسێن بەرۆشكێ و مە هاڤێتە رەبیا (بێسرێ) و مە هێرشكر و مە چەند عەملیات ل ئاكرێ كرینە و گەلەك عەملیاتێن دی ژی ل بیرا من نەماینە.
بێسری هەروەسا گۆت: ل سالا 1984ێ شەهید (محەمەد صالح بۆتی) بۆ بەرپرسێ لژنا ئاكرێ و ل گەل چووم و دووڤ دا هاتە ڤەگوهاستن بۆ لژنا ئامێدیێ و هەتا دووماهی یا سالا 1986ێ، ل شەرێ كانی ماسێ ل گەل شەهید (محەمەد صالح بۆتی) پشكداربووم وی شەری (محەمەد صالح) هاتە شەهیدكرن و ئەز برینداربووم و هەتا نوكە ژی نێزیكی 40 سەچما دلەشێ من دانە.
پێشمەرگە جەعفەر بێسری، بەحسێ بیرهاتنەكا خوە كر و گۆت: هاتینە ئاگەهداركرن كو دێ هێرشێ كەینە بارەگایەكێ (جێش شەعبی) ل گوندێ گرێ پانێ وی دەمی ئەم (35) پێشمەرگە ژ دەڤەرێ هاتینە و ب شەف چووینە (سینا) ژڤان بۆ ترۆمبێل بهێن و ب ترۆمبێلان بچین عملیاتێ بكەین و ب ترۆمبێلان بزڤرین و نەهاتن و نەچاربووین ل بانگێ سپێدێ ژ گوندێ(سینا) دەركەڤین چووینە سەر كانیەكێ و هەر دو پێشمەرگە ل گەل ئێك وی دەمی حوكمەت هاتبوو ئاگەهداركرن، كو پتر ژ (10000) هزار لەشكری هاتبوونە دەڤەرێ و هندەك ژ لەشكرێ ئیراقێ خوە دیاركر و نەچاربووین مە پاشكێشی كر و سلو خدر گۆت دێ چینە سینا و شكەفتنێن مەزن ل سینا هەنە و دێ خوە ڤەشێرین هەتا ب شەڤ و حوكمەت دیف مە داهات و نەهاڤێتە مە و دەر دورێن مە گرتن و قەلابەك وێرێ بوو سلو خدر گۆت هەرنە قەلابێ دا و ئیناینە دوستەكا دا وێ دەڤەرێ ب فەرمانا محەمەد صالح بۆتی مە خوە كرنە سێ پشك و من بدێربینێ هژمارتن (111) ترۆمبێل هاتن و دوستكەكا چەند مالێن بەرواری یا هەبوو تەرش خودان دكر و حوكمەتێ دەست ب هێرشێ كر و دەردورێن مە گرتن و سپێدە بوو و پێنچ هەڤالێن مە هاتنە گرتن و چەند هەڤالێن مە بریندار بوون و چەند هەڤالێن مە شكەفتا ڤە مانە ئاسێ و هێزەك بوومە هات و دووڤ دا مە هێرش كر و هەڤالێن خوە مە ژ شكەفتێ ڤە قورتالكرن و گەلەك شەرەكێ مەزن مەكر و 60 ژ لەشكەری مە كوشتن.
پێشمەرگێ گولانی خوەیاكر: نەخوشترین شەرێ پشكداربوویم شەرێ كانی ماسێ بوو و نەخوشترین رۆژ بوو دژیانا من دا چونكە هەڤالێ من (محەمەد صالح بۆتی) شەهید بوو و ئەو حەفت سال پتر بوو ئەم ل گەل ئێكن هزر كە بابێ من شەهید بوو هند عاجز نەبووم هندی بۆ (محەمەد صالح بۆتی) عاجزبووم، ل دەڤەرا بەهدینان چار زەلامێن وەكی وی نەبوون نە دگۆت هەرنێ ئەو بەرا هەمیا بوو وی ل شەرێ كانی ماسێ مە عەملیاتەكا مەزن كر و (712) دیل مە گرتن، چار فوج و مەقر و لیوا مە ستاند و حەفت رۆژا كانی ماسێ ما دەستێ مەدا، حەفت رۆژا دەوارێن دەڤەرا بەرواری یا چەك و خارن كێشا و خلاص نەبوو، شەهید محەمەد صالح بۆتی ژ كەسەكێ نەترسیا و ژ كەسەكێ ژی شەرم نەدكر و گەلەكێ مێر بوو و مرۆڤەكێ سیاسی بوو.
هێشتا گوت: ل ئەنفالان وەك هەمی خەلكێ كوردستانێ مە قەستا كەمپا دیاربكەر كر و رێكا ژیانێ ل كەمپێ و دناف سیمەی دا گەلەك یا بزحمەت بوو وی دەمی سەرۆك بارزانی بریار دابوو هەر كەسەكێ بخوە رێكەكێ بینت یێ ئازادە و دێ هەر دەف مە پێشمەرگەبیت و ئادارا سالا 1990 ل گەل 180 مرۆڤان ڤەگەریاینە پارێزگەها دهۆك .
هەمان پێشمەرگە گۆت: ل شەرێ pkk بابێ من شەهید بوو وی دەمی ئەم هەر دو پێشمەرگە بووین و بابێ من ل گەل (13) پێشمەرگا ب فرۆكێن تركی هاتە شەهیدكرن و ی دەمی توركیا دەف وێ هەر كی بهێتە كوشتن یا گرنگ نینە هەر دو كورد بوون و هاتمە مال هەر سێ هەیڤان مووچێ مە (300) دینار دهاتن و نەچاربووم ل كارەكی بۆ زارۆكێن خوە بگەرم و من ل كومپانیەكێ كاركر هەیڤێ (700) دینار و ماوێ (13) سالان مامە ل گەل كومپانیێ، پشتی (13) سالان هاتمە لژنێ و گۆتن دڤێت بچیە راهێنانا بكەی دێ بیە لەشكر من گۆتێ ناچمە راهێنانا چونكە كەسەكێ هندی من ل گەل نینە و ئەڤە هەمی هندی كورێن منن و هاتمە فەرماندێ (209) دینار دانەمە و حەفت هەیڤان مووچە دامن و دووڤ دا گۆت هاتیە ڤەگوهاستن وسێ هەیڤان من مووچە وەرگرت و دووڤ دا هاتمە ئاگەهداركرن كو مووچە ژلایێ وەزارەتا پێشمەرگەی ڤە هاتیە بڕین و ئاگەهداركرن كو خزمەت نینە و هاتیمە دروخستن و دەركەفتم و زڤریمە مال و پشتی بورینا سالەكێ چوومە وەزارەتا پێشمەرگەی و مە دیفچوون چەندین جهان كر و چەندین جاران مە دیفچوون وەزارەتا پێشمەرگەی كر و هەتا نوكە مووچێ پێشمەرگەیێ من نینە.
هێشتا گۆت: ژ عاجزیادا گەلەكا گۆتە من گەلەك مرۆڤێن خوە هەر بگەهە حزبەكا دی من گۆتێ سەد سالێن دی وەناكەم شەرم ژ مێژوو و خەباتا خوە و خوینا بابێ خوە دكەم، بوویمە پارتی و دێ مرم پارتی و مە بەرەڤانی ژ كەرامەت و ئاخا خوە كریە.
