ل عەفرینێ چەکدارێن لەشکرێ ئازاد شەرێ ھەڤدو دکەن
ئەڤرۆ نيوز:
ئازاد عەفرینی ژ باژێرێ عەمودێ یێ رۆژئاڤایێ کوردستانێ بۆ رۆژناما ئەڤرۆ دیار کر کو چەند رۆژن گرۆپێن چەکدار یێن جودا جودا کو د ناڤا لەشکرێ ئازاد یێ سووریێ دا ھەنە و تورکیا ژی پشتەڤانیا وان دکەت ل عەفرینێ شەرێ ھەڤدو دکەن، ناکۆکیێن وان ل سەر چاوانیا پارڤەکرنا دەستھەلاتێ و مالێن کوردانە و ژ بەر ھندێ ژی نھا شەرێ ھەڤدو دکەن و گۆت: (مرۆڤێن مە یێن نھا ل عەفرینێ دبێژن کو چەند رۆژن شەر ھەیە و ئەڤە دو رۆژن ژی شەر دژوار بوویە و ھەتا نھا چەندین کەس ژ ھەر دو ئالیان ھاتینە کوشتن و ژ بەر شەری ھەموو جھێن کاری یێن ل عەفرینێ ھاتینە داخستن و خەلک نەشێن بچنە دەرڤە).
ناڤبری ھەروەسا ئەو یەک ژی دیار کر کو گرۆپێ ئەحرار ئەلشەرقیە شەرێ گرۆپێن دی یێن لەشکرێ ئازاد دکەت، چونکو ئەندامێن وێ گرۆپێ دبێژن مە گەلەک قوربانی ل شەرێ عەفرینێ دایە و وەکو پێدڤی ئەم نەگەھشتینە مافێن خوە و ھەتا نھا ژی شەرێ د ناڤبەرا ئەحرار ئەلشەرقیە و گرۆپێن دی ل عەفرینێ بەردەوامە.
ئەو یەک د دەمەکێ دایە کو بەری چەند رۆژان ژی رێکخراوا مافێ مرۆڤی و چەندین رێکخراوێن دی ب بەلگە دیار کربوون کو ئەو گرۆپێن تورکیا پشتەڤانیا وان دکەت ل عەفرینێ مافێ مرۆڤی بنپێ دکەن و تاوانێن شەری ئەنجام داینە.