ل قارەمانەکێ دگەریێت
ئەڤرۆ نیوز، نەوزاد ھلۆرێ:
دەرھێنەرێ کورد سەھیم عومەر دەمەکە لدوڤ زاروکەکێ دگەریێت داکو ببیتە قارەمانێ فلمێ وی یێ نوو، ئەو زاروک دڤێت یێ کێم ئەندام بیت ئانکو سقەت، راگەھاندنا فلمی بۆ ئەڤرۆ نیوز دیارکر کو فلم ژی لسەر یاریکەرێ جیھانی مێسی یە بناڤێ مێسیێ بەغدا.
پەسار فایق، بەرپرسێ راگەھاندنا فلمێ مێسیێ بەغدا بۆ ئەڤرۆ نیوز گوت: (فلمێ مێسیێ بەغدا ئێکە ژ فلمێن سینەمایێن درێژ، لسەر کەساتیا زاروکەکێ کێم ئەندامە و تنێ پیەک ھەیە، ژلایێ سینەماکار سەھیم عومەر دھێتە دروستکرن و ئەو بخوە دەرھێنەرێ فلمی یە).
زێدەتر گوت: (ھەتا نوکە چ قارەمان بۆ وی فلمی نەھاتینە دیتن، نوکە سەحا زاروکەکێ دکەین کو ببیتە قارەمان، بەلێ دڤێت ئەو زاروک ژیێ وی دناڤبەرا نەھـ بو 13 سالی بیت زمانێ عەرەبی ب شێوازێ عیراقی بزانیت، دیسان دڤێت خودان پێدڤیێ تایبەت بیت ئانکو سقەت بیت ب پیەکێ).
ناڤبری دیارکر ژی کو پێشتر فلمێ مێسیێ بەغدا ل سالا 2012 وەکو کورتە فلم ژلایێ ھەمان دەرھێنەر ھاتیە چێکرن و پتری 60 خەلاتێن جیھانی وەرگرتێنە و دخوازیت ھەمان فلم ب شێوازێ درێژ درۆست بکەت و زێدەتر گۆت: (بودجا پێدڤی یا بەرھەمئینانا فلمێ مێسیێ بەغدا وەکو فلمەکێ درێژ لایێ بەلژیکا ھاتیە دابینکرن).
