ل قووناغا سەرەتایی من ستران دگۆتن
زاخۆ، دلۆڤان هالۆ:
هونەرمەندێ گەنج و دەنگ خوەش یێ ئیدارەیا سەربخوە یا زاخۆ جادر زاخۆیی د دیدارەکا هونەری دا بۆ ڕۆژناما ئەڤرۆ دیارکر کو هەر ل قووناغا سەرەتایی حەزا ستران گۆتنێ ل دەف من پەیدا بوویە، وی دەمی حەفتیێ جارەکێ ل مەیدانا قوتابخانێ من سترانەك د گۆتن و شەرم ژی ل دەف من هەبوو چونکی ئەز ل بەرامبەری هەموو قوتابیێن قوتابخانێ بووم.
ناڤهاتی ئاماژە ب وێ چەندێ ژی کر د نوکە دا ئەز بەردەوام ل ڕۆنشتنێن تایبەت سترانان دبێژم، و هندەك جاران دچمە شەهیان و ڕۆژبوونان، و هەستەکێ خوەشە کو خەلك حەز ژ مرۆڤی بکەت کو مرۆڤ پێ سەرفەراز بیت د مللەتێ خوە و باژێڕێ خوە دا، لەوما دێ ل سەر کار و خزمەتا خوە یا هونەری بەردەوام بم، هەروەسا ئەز ل تۆڕێن جڤاکی ژی یێ چالاكم کو هەڤالەکێ من هەمێ ئەکاونتێن من یێن تۆڕێن جڤاکی برێڤە دبیت وەکو فێسبۆك و ئینستگرام و یۆتیوبی کو هەموو کارێن من یێن هونەری لێ بەلاڤ دکەت.
گۆت ژی:»ئەز بخوە هەردەم پێکولان دکەم کو د کارێ خوە دا یێ سەرکەفتی بم، لێ یا پێدڤیە جهێن پەیوەندیدار ژی پتر هاریکاریا تەخا مە یا هونەرمەندان بکەن داکو بشێن کارێن مەزن یێن هونەری ئەنجام بدەن و یێن سەرکەفتی بن د کارێ خوە دا، حەز دکەم پتر گرنگی ب فولکلورێ مە بهێتە دان، دڤێت کۆنسێرت بۆ هونەرمەندان بهێنە سازکرن».
زێدەتر ژی گۆت:»گەلەك کەس دبێژنە من دەنگێ تە نێزیکی یێ هونەرمەند عەبدولقار زاخۆیی یە، ئەڤە شانازیەکە کو دەنگێ من نێزیکی دەنگێ وی، لێ ئەز بخوە دبینم ستایلێ من یێ جوودایە، بتنێ دەنگ نێزیکی یێ وی یە، چونکی ئەز حەز ژ چاڤ لێکرنێ ناکەم».
