ل كۆرنیشا زاخۆ
عەبدولرەحمان بامەرنی
ئەز دێ ژ گۆتنەكا (لیو تولستۆی) ل دۆر پاقژیێ، بابەتێ خوە نڤیسم، ئەو دبێژیت (كەسێ پاقژ، ب هشیاری دناڤ گلێشی دا هاتنووچۆنێ دكەت، بەلێ دەمێ پێلاڤا وی پیس بوو، هشیارییا وی كێمتر لێ دهێت و دەمێ دبینیت پێلاڤێن هەموویان دپیسن، ئەو هشیاری یە ژی ل دەف نامینیت و گوهنادەتە پیسبوونا پێلاڤا خوە) و ل بیرا منە هێشتا ئەم زارۆك بووین، ئەم هاتبووینە پەروەردەكرن، نابیت گلێش بكەڤیتە سەر (مەحفیرێ) و دگەل ڤێ پەروەردەكرنێ، دەمێ دچمە جهەكێ میری یان ئۆفیسەكێ و مۆكێتەكێ لێ دبینم، من یا هەولدا یی پێلاڤێن خوە بێخم، لێ یێن گۆتینە من ئاساییە پێ لێدانی و دەما ب ژۆر كەفتیم، مۆكێتەكا پاقژ دكەفتە بەرچاڤێن من. هەر چاوا بیت ئەو هندەك بابەتێن دی بوون و یا من مە بەست پێ، بەری چەند رۆژان ئەم بۆ كارەكێ ل زاخۆ بووین و مە پیاسەیەك ل كۆرنیشێ زاخۆ كر، ئەز بەحسێ جوانییا وێ ناكەم و ئەو پارێ لێ هاتیە مەزاختن و دێ شێت چەند گەشتیاران بۆ لایێ خوە راكێشیت، ژبلی پەیداكرنا سیمایێن شارستانەیەتێ لڤی باژێری، لێ یا من تێبینی كری، ل چ جهان گلێش ب بەرچاڤێن من نەكەفت و تشتێ ئەز پالدایمە ڤێ نڤیسینێ ژی، دروستبوونا ڤێ پرسیارێ بوو، ئەو چ ئەگەرن ل جهەكێ دی ئەم گلێشێ خوە پاڤێژینە سەر عەردی و ل ڤێرە گلێشێ خوە بكەینە دجهێ گلێشی دا، ب دیتنا من دو ئەگەر هەنە، ئێك ب گۆتنا (لیو تولستۆی)ڤە گرێداییە و ئێك ژی ب پەروەردەكرنا مەڤە، یا تولستۆی، دەمێ ئەزێ گەشتیار چ گلێشەكی ل چ جهان نەبینم، ئەز ب خوە دێ شەرم كەم گلێشێ خوە پاڤێژم سەرعەردی و خوە ئەگەر چاڤێ كەسەكی لمن نەبیت و یا دویێ ژی ئەم ژخوە دەستپێبكەین، بۆ نموونە ئەگەر مە بڤێت دیاردەیەكێ كێم بكەین، ل جهەكێ گشتی، ل سەر جاددێ، ل بەرچاڤێن خەلكی، جارەكێ دوویان ئەم گلێشی ژ عەردی راكەین و بكەینە دجهێ وی یێ تایبەت دا، ئەڤ خەلكێ بەرێ خوە ددەتە مە، ئەگەر چاڤ لمە نەكەت ژی، لێ ئێدی ئەو دێ شەرم كەت و ل هەر جهی گلێشێ خوە پاڤێژیت.
