ل كەمپا مێردینێ خەلكێ مە باوەری ب نۆشدارێن تورك نەبوو لەوما بارێ مە گەلەكێ گران بوو
دیدار، سالار محەمەد دۆسكی:
نوژدارەكێ شورەشا 26ی گولانا پێشكەفتن خواز، د دیدارەكا رۆژنامەڤانی دا بەحسێ رۆژانێن كارێ خوە دكەت ل سەر دەمێ شورەشێ و ل پەنابەریێ دناڤا كەمپان دا ل وەلاتێ توركیا و ئەو نەخوشی و دەردەسەریێن ب سەرێ مللەتێ مە هاتین، دیار دكەت كو بارێ وان ل كەمپان گەلەكێ گران بوو چونكە خەلكی باوەری ب نۆشدار و نەخوشخانێن توركیا نەبوو.
جەوزل مستەفا وەرمێلی، پێشمەرگێ شورەشا 26ی گولانا پێشكەفتن خواز د دیدارەكێ دا بۆ رۆژناما ئەڤرۆ گۆت: ل سالا 1985 پەیمانگەها بلند یا پزیشكی ل باژێرێ سلێمانیێ من ب دووماهی ئینا و ل سالا 1986 هاتنە دامەزراندن ل (بەعاج) ل قەزا شنگال و پشتی چار هەیڤان، ڤەگوهاستنا من هات و هاتمە نەفیكرن بۆ پارێزگەها سەماوە و پشتی بورینا هەشت هەیڤان ژ دەوامكرنێ وێ پارێزگەهێ زڤریمە كوردستانێ و ئێكسەر ل سالا 1987 من پەیوەندی ب لژنا ئامێدیێ كر سەر ب لقێ ئێكا پارتی دیموكراتی كوردستان ڤە.
جەوزل زێدەتر گۆت: گەلەك چلااكیێن پێشمەرگەی پشكدار بووین و گەلەك پێشمەرگە بریندار دبوون و ئەم بەردەوام ل گەل بووین و مە دەرمانكرن و هێرشا فرۆكخانا (بامەرنێ) و راكرنا گەلەك رەبیێن دوژمنی پشكدار بوویمە و دیسا مە سەرەدانا گوندێن كوردستانێ دكر ل دەڤەرێن ئازادكری و گەلەك جاران بریندار ل گوندان هەبووینە و مە دەرمانكرینە.
نۆشدارێ شۆرەشا 26ی گولانا پێشكەفتن خواز، جەوزل وەرمێلی، زێدەتر گۆت: پێدڤیێن ساخلەمی وی دەمی گەلەك كێم بوون و لەفاف و پلاستەر و عملیاتێن بچووك بەردەوام ل بەر دەستێ مە هەبووینە و مە كار ل سەر دكر، وی دەمی دەرمان گەلەك كێم بوون، ئەگەر ب رێكا خەلكی یان رێكخستنێ هندەك جاران دەرمان گەهشت بانە مە و گەلەك جاران ژی مە دەرمان كرین.
هێشتا گۆت: دماوێ ل گەل شۆرەشێ عملیاتێن بچوویك بۆ پێشمەرگەی من كرینە و عملیاتێن مەزن من نەكرینە و زێدەتر بەرك مە ژ لەشی دئینانە دەرێ.
هەمان نۆشدار گۆتژی: مە كارێ خوە ل شۆرەشێ بەردەوامی دایێ هەتا هەوا ئەنفالێن رەش ل سالا 1988ێ و دووف دا ل گەل خێزان و كەس و كارێن خوە چوومە كەمپا (مێردینێ) بن چادران ئاكجنی بووین، و هەر ل هەمان جه ژی مە دەست هاڤێتە كارێ خوە وی دەمی ئەم چار هاریكارێن نۆشداری بووین و (12) برین پێچ بوون و مە چارەسەریا نەخوشا دكر و بارێ مە گەلەك گرانتر لێ هات وی دەمی وەلاتێ توركیا گەلەك چاڤدان ل خەلكێ مە نەدكر و هەمان دەم خەلكێ مە ژی باوەری ب نۆشدارێن توركا نەبوو و زێدەتر حەزا وا ئەو بوو ئەم چارەسەریێ لدیف شیان و شارەزایا خوە بۆ بكەین و هەتا ئەگەر سەرەدانا نۆشدارێن توركیا كربا ژی و چارەسەری ژی وەرگرتبا هەتا پرسیارا مە نەكربا ئەو چارەسەری بكارنەتینان و ترس دەف هەبوو و بێ باوەری بوو و تایبەت پشتی ژەهر كرینە دناڤا نانی دا و نێزیكی 3000 هزار كەسان پێ كەتن و هەتا نەخوشخانێن مێردینێ ئەو نەخوش نە وەرگرتن و جارەكا دی زڤراندن و مانە ب هیڤیا بنگەهێن ساخلەمیێ ڤە و شیانێن ئەوان بنگەهێن ساخلەمیێ ژی دسنوردار كری بوون و ئەوێ هژمارە مەزنا نەخوشان و حوكمەتا توركیا گۆتن بلا ئەو نەخوش بزڤرنە دناڤا كەمپێ دا و ئەم دێ چارەسەریێ دەینە هەوە و ئەڤە ژ بەر وێ چەندێ بوو دا ئەف دەنگویە ل راگەهاندنێ نەهێتە بەلاڤەكرن و زێدەتر رۆژنامەڤان نەهێنە دناڤا نەخوشان دا و پرسیارا ژێ بكەن ل سەر بابەتی و هەر هەمی هاتنە دناڤا كەمپێ دا و مە چارەسەری بۆ كر هەتا رەوشا ئەوان نەخوشان باشتر لێ هاتی.
هەمان نۆشارێ شۆرەشێ گۆت: كەمپا مێردینێ مە كرە چار بەش و هەر هاریكارەكێ نۆشداری ل گەل چەند برین پێچان مە دانا بەشەكی و مە لژنەكا نۆشداران هەبوو وی دەمی ئەژی ئێك ژ ئەندامێن وێ لژنێ بووم، د.كەمال بەرپرسێ وێ لژنێ بوو و د. عەلی و د.محمود بوو، پشتی ئەوێ روودانا ژەهركرنا خەلكی ئێدی پتر نەباوەری ل گەل نۆشدارێن توركیا بۆ خەلكێ مە دروست بوو و ئێدی پتریا خەلكێ مە خوە هێلا ب هیڤیا مە ڤە و بارێ مە گەلەك گران بوو و رۆژانە مە چارەسەریا خەلكێ خوە دكر ژ بچوویك و ژن و مەزن و هەتا حالەتێن ژدایك بوونا ژی مە چارەسەری بۆ دكر و دەرمان ژی گەلەك بزحمەت دەست ب مە دكەفتن و ئەگەر مالەكێ دەرمانەك هەبا رادەستی مەدكر یان نەخوشەك هاتبا چارەسەكرن و ئەو دەرمانێ مای بوومە دڤەگەراند و رۆلێ د.حەمید باڤی ناهێتە ژبیركرن و گەلەك جاران ب رێكێن خوە دچوو دەرڤەی كەمپێ و ب رێكێن جودا دەرمان بوومە تینان و كرنە بن فێقی و رادەستی مەدكرن و مە ل سەر بنگەهێن خوەیێن ساخلەمیێ ئەوێن مە دروستكرین دناڤا كەمپێ دا مە بەلاڤەدكرن و دیسا لژنەك مە هەبوو ل بەر بنگەهێن مە بوو و ئەو ژی گەلەك جاران دەرمان ژ نەخوشخانێن توركیا بوومە تینان و رادەستی مە كرن و مە چارەسەریا خەلكێ خوە دكر.
هەمان نۆشدارێ شۆرەشێ گۆتژی: پشتی سەرهلدانا پیرۆزا سالا 1991ێ ئەم ڤەگەریاینە كوردستانێ و دووبارە من دەست هاڤێتە چەكێ شەرەفێ بوومە پێشمەرگە سەر ب لژنا ناوچا دهۆك ڤە و دووڤ دا بوومە ئەندامێ لژنا رێكخستنێ یا لەشكری ل سێمێلێ و بەردەوام بووم هەتا سالا 1995ێ و دووف دا دووبارە ڤەگەریامە سەر كارێ خوەیێ هاریكارێ نۆشداری ل فەرمانگەهێن حوكمەتا هەرێما كوردستانێ و هەتا نوكە بەردەوام ل نەخوشخانا ئازادی ل سەر كارێ خوە.
ل دور چالاكیا خیڤتەگەها 26ی گولانێ ژی ئەوا هاتیە ئەنجامدان ژلایێ لقێ ئێكێ پارتی ڤە، هەمان نۆشدارێ شۆرەشێ گۆت: هەبوونا ئەڤان چالاكیان گەلەك گرنگیا خوە هەیە وەك بیرهاتنەك دهێتە ساخكرن و مە هەڤالێن خوەیێن رۆژێن سەخت و دژوار دیتن و دیسا مە بریندار دیتن و ئەو بیر دهێنە بیرا مە و ئەم گەلەك كەیف خوشین.
ل دووماهیێ، نۆشدارێ شۆرەشا 26ی گولانا پێشكەفتن خواز گۆت: ئازادی یا ئەڤرۆ بەرهەمێ خوینا شەهیدێن كوردستانێ یە و مە هیڤی هەنە پارتێن كوردستانێ زدێدەتر نێزیكی ئێك بن و دەستێن خوە بكەنە دناڤ ئێك دا و بەرهەمێ خوینا ئەڤان شەهیدان ب پارێزێن سەخمراتی ئەڤێ ئازادیێ و تەناهیێ و خوینا گەنج و لاوێن كورد ب هەروە نەچین و زێدەتر گیانێ برایەتی و لێبورینێ دناڤبەرا مە دا خور ببیت.
