ل كەنەدا گەنجەكێ كورد شیا ڕیكۆردەكا گێنس بشكێنیت
زنار تۆڤی:
گەنجەكێ كورد ب ناڤێ هەلكەت جەعفەر تۆڤی ل وەلاتێ كەنەدا، شیا ریكۆردێ پرتووكا گێنس یێ ئامیرێ پێنگاڤان ل 31 ی تەباخا 2025 ێ بشكێنیت، كو پتری 24 دەمژمێران ل سەر وی ئامیری و هاڤێتنا پێنگاڤان یێ بەردەوامبوو. بابێ وی گەنجی، بۆ رۆژناما ئەڤرۆ دیار كر: ئەو كارێ كورێ من ئەنجامدایی، كارەكێ مەزن بوو، هەروەسا وی گەلەك بەرهەڤی بۆ ڤی كاری كربوون، د دەمێ 24 دەمژمێران دا، ئەو 111 هزار و 285 یا پێپەلک (درج) سەركەفتیە، هەروەسا ئەو شیا پتری سێ هزار پێلكا ژ ڕیكۆردا بەری نوكە پتر بچیت و ریكۆردا بەرێ بشكێنیت، كو ریكۆردێ بەری نوكە 108 هزار و 887 پەیسك بوون، ئەڤە چەندین سالە وی بەرهەڤی بۆ ڤێ رۆژێ دكرن و وی باوەریەكا مەزن ب خۆ هەبوو، كو دێ ڤی ریكۆردێ پەرتووكا گێنس شكێنیت و شیا ناڤێ خۆ د پەرتووكا گێنس دا تۆمار بكەت و ئەڤە بۆ مە وەكو مالبات و هەروەسا وەكو كوردەك ژی گەلەك گرنگیا خۆ هەیە و بۆ مە و كوردستانێ ژی شانازیەكا مەزنە. ناڤهاتی گۆت ژی: د ماوێ وان 24 دەمژمێران دا ب رەنگەكێ بەردەوام ئەوی پێنگاڤ دهاڤێتن و یێ رژدبوو، ل سەر هندێ كو ئەو دێ ڤی ریكۆردی شكێنیت و ل دووماهیێ شیا وی ریكۆردی بشكێنیت و خەونا وی یا چەندین سالان بجه هات.
