ل مزگەفتێ دەستدرێژیا سکسی کرە سەر
ئەڤرۆ نیوز:
د روودانەکا دەستدرێژیکرنا سکسی دا، تاوانبارەک زارۆیەکا پێنج سالی ب ھێجەتا پارا سەردا دبەت و ل مزگەفتەکێ دەستدرێژیا سکسی ل سەر دکەت، د ھەمبەری دا کەسوکارێن ڤێ زارۆیێ سکالا تۆمار کریە و دەیکا وێ دخوازیت ل بەر چاڤێن وێ تاوانباری بسۆژن، ژ ئالیێ خوەڤە مافناس دبێژن سزا دێ گەلەکێ دژوار بیت.
تۆرا میدیا رووداو ئەڤ بوویەرە بەلاڤ کریە و دبێژیت، ئەڤە رۆژا ئەڤ تاوانە دەرحەقێ ڤێ زارۆیێ ھاتیە کرن، دایکا وێ ب تنێ دکەتە گری و بۆ رووداو خویا کر کو بەری نیڤرۆیەکێ فرێکرە مالا ھندەک مرۆڤێن خوە کو ئەو ژی جیرانێن وانن، لێ ب رێکێ ڤە کەسەکی ب وێ ھێجەتێ کو دێ پارا دەتێ سەردابر و برە د مزگەفتا تاخی ڤە و دەستدرێژیا سکسی ل سەر کر و ھەر ب گری گۆت “باشە گونەھا زارۆیا من چی یە ئەڤە ب سەری ئینای، ئەز دخوازم ئەوێ ئەڤ کریارا درندانە کری ل بەر چاڤێن من بسۆژن”.
ئەڤ زارۆیا پێنج سالی کارتێکرنەکا وسا لێ ھاتیەکرن، ژ بلی کو نەشێت سەرێ خوە راکەت نەشێت باحڤیت ژی.
ل گۆر رێنمایێن وەزارەتا ئەوقاف و کاروبارێن ئاینی، پێدڤیە پشتی دەمێ نڤێژێ و عیبادەتی دەرگەھێن مزگەفتان بھێنە داخستن، ھەروەسا ھەر روودانەک ل مزگەفتان روو بدەت بەرپرساتی دکەڤیتە ستۆیێ ئیمام و خوتبەخوینی و مجێورێ مزگەفتێ، لەورا وەسا دیارە د وێ رۆژێ دا کێمتر پێگیری ب وان رێنمایان ھاتیەکرن.
ل گۆر ئاماران سالا بۆری 116 ئافرەتان دەستدرێژی سێکسی ل سەر ھاتیە کرن، لێ ئەڤ سالە ئەو رێژە کێم بوویە، ب ئاوایەکی دەستدرێژی ل سەر 110 ئافرەتان ھاتیەکرن.
