ل مۆزەخانەیا پەروەردەیی ل ئاكرێ ٢٥٠٠ كەرەستەیێن كەڤن هاتینە پاراستن
رەمەزان زەكەریا
پەرتووك و پێنڤیس و كەرەستەیێن بەریا 105 سالان ل ناڤ مۆزەخانەكا پەروەردەیی ل ئاكرێ هاتینە پاراستن و دبیتە ئێكەم مۆزەخانا پەروەردەیی ل سەر ئاستێ پارێزگەها دهۆك هاتیە ڤەكرن، دیرۆكا پشكەكا كەرەستەیان بۆ سالا 1905 زاینی ڤەدگەرێت.
مامۆستا ئەروین محەمەد، سەرپەرشتێ پەروەردەیی ل ئاكرێ بۆ ئەڤرۆ گۆت : مە ئەڤ هزرە وەرگرت مۆزەخانەكا كەرەستەیێن كەڤنێن پەروەردەیی ب دانین، ئەم ڤان كەرەستەیێن كەڤن یێن ناڤ قوتابخانا هەموویان كۆمبكەین و بینینە جهەكێ كو ببیتە مەلبەندەك بۆ ڤەگەراندنا دیرۆكا مە كو خۆ تێدا ببینین، بەریا ئەڤ تشتە ژناڤ بچن مە ل مۆزەخانێ كۆمكرینە و نێزیكی ٢٥٠٠ كەرەستەیێن كەڤن تێدا هاتینە دانان.
ئارمانجا مە ئەوە مۆزەخانە ببیتە جهێ گەشتێن زانستی بۆ قوتابیان و بهێن سەرەدانێ بكەن و ببینین كو دیرۆكا ڤی باژێری چەندا كەڤنارە و ل دەمێ ئەو پێدڤی بەلگەیێن كۆلتۆری یێن پەروەردەیی دبن دێ ب ساناهی ب دەست كەڤن.
مامۆستا شیمال شەعبان، رێڤەبەرێ مۆزەخانا پەروەردەیی یا ئاكرێ بۆ ئەڤرۆ گۆت: تۆمارێن گشتی و تومارێن ماموستایان و پرۆگرامن و كورسی و تەباشیرن و سەبۆرەنە و كەرەستەیێن كەڤن یێن تاقیگەها مە هەنە و وێنێن ماموستا و قوتابیانە كو ل سالێن ١٩٢٠ و هەتا نوكە هاتینە پاراستن، قوتابخانا ئاكرێ یا بنەرەت، دەهان وەزیر و پەرلەمانتار و بەرپرس پێگەهاندینە ل سەر ئاستێ كوردستانێ و نوكە ژی كەرەستەیێن سەردەمێ بەرێ هەموو هاتینە پاراستن د ناڤ مۆزەخانەیەكا تایبەتا پەروەردێ دا.
