ل ناڤەراستا هەیڤا بهێت 70 هزار کەس ب گرێبەست دێ هێنە دامەزراندن
ئەڤرۆ نیۆز،زنار تۆڤی:
نێزیکی 70 هزار کەسان ب شێوێ گرێبەست ل کۆمسیۆنا بلند یا سەربەخۆیا هەڵبژاردنان دێ هێنە دامەزراندن،ب گۆتنا بەرپرسەکێ بلند کو ئەو کۆمسیۆنە ل ناڤەراستا حەفتیا بهێت دێ دەست ب ئەنجامدانا گرێبەستان هێتەکرن.
کاروان جەلال رێڤەبەرێ گشتی یێ داتایان ل کۆمسیۆنا بلند یا سەربەخۆیا هەڵبژاردنان و راپرسیێ بۆ رووداوێ راگەهاندیە،کو حەفتیا بهێت دێ رێکار هێنە دیارکرن بۆ ئەنجامدانا گرێبەستان و ل ناڤەڕاستا هەیڤا تەمۆزێ دێ دەست ب واژۆکرنا گرێبەستان هێتەکرن.
کاروان جەلال گۆتیە ژی، دوجۆرێن گرێبەستان دێ هێنە ئەنجامدان،کو کورتخایەن و درێژخایەنن،گرێبەستێن کورتخایەن ئێک هەیڤیە ماوێ وێ و گرێبەستا درێژخایەن ژی زێدەترە ژ سێ هەیڤان.
سەبارەت ب مەرجێ ئەنجامدانا گرێبەستێ، رێڤەبەرێ گشتی یێ داتایێن کۆمسیۆنێ ئاشکراکریە،کو بڕیارا دوماهیێ نەهاتیەدان، بەلێ بۆ گرێبەستێن درێژخایەن دڤێت بڕوانامەیێن بەکالۆریۆسێ یان دبلۆمێ هەبیت، هەروەسا ئەو کەسێن کو پێشتر ل گەل کۆمسیۆنا عێراقێ ب گرێبەست کارکریە،شەنسێ وان زێدەترە،هەروەسا ئەو کەسێن کو هاتینە دامەزراندن ژی مافێ ئەنجامدانا گرێبەستێ نینە.
کاروان جەلال گوتیە ژی، نێزیکی 12 هزار وێستگەهێن دەنگدانێ هەنە، کو پێدڤی ب نێزیکی 60 هزار کارمەندانە، هەروەسا 2030 بنگەهێن دەنگدانێ ژی هەنە کو ئەوان ژی پێدڤی ب نێزیکی شەش هزار کارمەندان هەیە ل گەل چار هزار کارمەندێن یەدەک.
