ل ناڤەراستا ڤێ مەهێ دێ پێشانگەهەكێ ل بەرلین ڤەكەت
زنار تۆڤی:
شێوەكار (لۆقمان ئەحمەد) كو ژ سالا 2010 وەرە ل باژێرێ ڤیرجینیا ل وەلاتێ ئەمریكا دژیت، د دیدارەكێ دا بۆ رۆژنامەیا ئەڤرۆ دبێژیت: ل سالا بۆری من پێشانگەهەك ب ناڤێ(پەنجەرا رەنگین) ل باژێرێ بەرلین ل وەلاتێ ئەلمانیا ڤەكر، د وێ پێشانگەهێ دا (47) كەڤال هاتبوونە نیشادان، تایبەت بۆ كوردان هاتبوو ڤەكرن، من شەڤەك ژ بۆ پەنابەرێن عەفرینێ سازكر و هژمارەكا چەندین كەڤالێن خوە دانانە بەر فرۆتنێ و ئەز شیام هندەك پاران بۆ وان كۆمڤە بكەم، هەروەسل (15) ڤێ هەیڤێ هەر ل بەرلین دێ پێشانگەهەكا دی ڤەكەم، هەروەسا دێ هژمارەكا دی یالا چالاكییان هەر دڤێ هەیڤێ دا دێ ل بەرلینێ ئەنجام دەم.
ناڤهاتی گۆت: ل سالا 2014 من وەك رۆژنامەڤان و پێشكێشكار ل رادیۆیا كوردی دەنگێ ئەمریكا ل واشنتۆن كاردكر، من بەرنامە یەكێ هونەری ب ناڤێ (حەفت رەنگ) هەیە و هەتا نوكە من هژمارەكا پێشانگەهێن شێوەكاری ل چەندین وەلاتێن جودا یێن جیهانێ ڤەكرینە، شێوازێ كارێ من پتر كارەكێ دەربڕین تێدایە، هندەك سیمبۆلێن كوردان و دیرۆكی ژی تێدا هەنە، هەروەسا ئەز هەست و كلتۆرێ كوردان ژی تێدا نیشا ددەم، ئەز چاندا كوردی ب رەنگەكێ جوان بۆ خەلكێ جیهانێ ددەمە دیاركرن، ب تایبەتی ژنێن كورد ب جلێن كوردی نیشا ددەم.
