ل نێزیك ناڤێن یەكەیێن كرێداران دێ هێنە ڤاڤارتن
هەولێر، قائید میرۆ:
سەرۆكێ دەستەیا گشتیا وەبەرهێنانێ ئاشكرا كر، گیرۆبوونا ئاڤاكرنا شوقەیێن كرێداران بۆ ئاریشەیا دارایی ڤەدگەڕیت و د دەمەكێ نێزیك دا ناڤێن كرێداران دێ هێنە ڤاڤارتن و تیرۆپشك بۆ ناڤێن وان كەسان دێ هێتە كرن یێن ناڤێن خوە بۆ یەكەیێن ئاكنجیبوونێ تۆماركرین.
دكتۆر محەمەد شوكری، سەرۆكێ دەستەیا گشتیا وەبەرهێنانێ بۆ رۆژناما ئەڤرۆ دیار كر، پڕۆژەیێ ئاڤاكرنا یەكەیێن ئاكنجیبوونێ بۆ خەلكێ كرێدار قووناغێن باش بڕینە و حوكمەتا هەرێما كوردستانێ یا رژدە ل سەر بجهئینانا پڕۆژەیێ ئاڤاكرنا یەكەیێن ئاكنجیبوونێ بۆ خەلكێ كرێدار و هەژار و گۆت: «گیرۆبوونا پڕۆژەیێ یەكەیێن ئاكنجیبوونێ بۆ كرێداران، بۆ ئاریشەیا دارایی ڤەدگەڕیت و چو ئاریشەیێن دی نەبووینە، لەوڕا هەموو بزاڤەك دهێتە كرن بۆ دەستپێكرنا پڕۆژەیێ ئاڤاكرنا یەكەیێن ئاكنجیبوونێ بۆ خەلكێ هەژار و كرێدار».
دكتۆر محەمەد شوكری گۆتژی: «د دەمەكێ نێزیك دا ناڤێن وان وەلاتیان دێ هێنە ڤاڤارتن یێن وەكی كرێدار ناڤێن خوە تۆماركرین و دێ تیرۆپشك بۆ ناڤێن وان هێتە كرن، هەتا هەر وەلاتیەكێ كرێدار بزانیت ناڤێ وی دەركەفتیە و كەسێن مەرج تێدا نەبن دێ هێنە لادان، چونكی خالبەندی هەنە بۆ كەسێن بڕیارە مفادار بن ل شوقەیێن حوكمەتا هەرێما كوردستانێ و مەرەم ب تنێ خەلكێ كرێدار و هەژارە».
